रुग्णांचे मनोधैर्य वाढविण्यासाठी कोव्हिड सेंटरमध्ये नगरसेवक संतोष भेगडे यांच्या पुढाकाराने एरोबिकचे आयोजन
मावळ तालुक्यातील कृषी पणन कोव्हीड सेंटर व तोलानी कोव्हीड सेंटर येथे रुग्णांचे मनोधैर्य वाढविण्यासाठी तसेच शारीरिक व्यायामासाठी एरोबिकचे आयोजन करण्यात आले होते. नगरसेवक संतोष भेगडे यांच्या पुढाकाराने पार्थदादा पवार फाउंडेशनच्या वतीने हे आयोजन करण्यात आले होते.
मागील दोन वर्षांपासून संपूर्ण जगभरात कोरोनाने थैमान घातले आहे. पुणे जिल्ह्यात कोरोनाचा सर्वाधिक कहर पाहायला मिळाला. महाराष्ट्रातील कोरोनाचा पहिला रुग्ण देखील पुण्यातूनच समोर आला होता. आणि आता दुसऱ्या लाटेत देखील पुणे जिल्ह्याला ग्रामीण भागासह कोरोनाने विळखा घातला. पार्थदादा पवार फाउंडेशनच्या वतीने व तळेगाव दाभाडे नगरपरिषदेचे नगरसेवक संतोष भेगडे यांच्या प्रयत्नाने कोरोना रुग्णांसाठी एरोबिकचे आयोजन करण्यात आले होते. या आयोजना नंतर सहभागी झालेल्या रुग्णांमध्ये सकारात्मक बदल घडत असल्याचे डॉक्टरांनी आयोजकांना कळवले आहे.
मावळ तालुक्यातील पहिले नृत्य प्रशिक्षक म्हणून ओळखले जाणारे राहुल देठे यांनी ‘स्टेप हार्ड डान्स एकेडमी’ मार्फत पुढाकार घेतला होता. कोरोना सुरू झाल्या पासून डान्स एकेडमी पूर्वपदावर नसल्याने आर्थिक परिस्थितीचा सामना नृत्य प्रशिक्षक राहुल देठे यांना करावा लागतोय. मात्र अशाही परिस्थितीत स्वतः सकारात्मक राहून इतरांनाही ते मानसिक व शारीरिक सदृढ ठेवण्याचे समाजकार्य ते करीत आहेत. या एरोबिक मध्ये कोरोनाग्रस्त रूग्णांसाठी त्यांनी विना मोबदला समाजकार्य करण्याचे काम सुरू ठेवले आहे. यामुळे त्यांचे कोरोना योद्धा म्हणून विशेष कौतुक होत आहे.
तळेगाव दाभाडे नगरपरिषदेचे नगरसेवक संतोष भेगडे हे देखील कोरोना सुरू झाल्यापासून सामाजिक क्षेत्रात अधिक मेहनत घेत आहेत. तळा गाळात उतरून त्यांनी मागील दोन वर्षांत अनेक गरजूंना मदत केली आहे. समाजकार्याचा वसा असाच पुढे सुरू ठेवणार असल्याचं नगरसेवक संतोष भेगडे यांनी सांगितले आहे.
-संतोष दिवाडकर
