CSMT Sawant Wadi Road Express लवकरच होणार सुरू
CSMT Sawant Wadi Road Express : गणेशोत्सव तोंडावर असताना कोकण रेल्वे मार्गावरील प्रवाशांसाठी आनंदाची बातमी आहे. भारतीय रेल्वेने छत्रपती शिवाजी महाराज टर्मिनस मुंबई ते सावंतवाडी रोड दरम्यान नवीन एक्स्प्रेस रेल्वे सेवा सुरू करण्यास मंजुरी दिली आहे. या निर्णयामुळे कोकणात येणाऱ्या-जाणाऱ्या लाखो कोकणवासीय चाकरमान्यांना मोठा दिलासा मिळणार आहे. ‘आझादी का अमृत महोत्सव’ उपक्रमांतर्गत भारतीय रेल्वेने हा निर्णय घेतला आहे.
नुकत्याच झालेल्या बैठकीत कोकण रेल्वे मार्गावर नवीन दैनिक रेल्वे सुरू करण्याची प्रमुख मागणी करण्यात आली होती. नवीन रेल्वे सेवा गाडी क्रमांक १५०८७ छत्रपती शिवाजी महाराज टर्मिनस-सावंतवाडी रोड एक्स्प्रेस आणि गाडी क्रमांक १५०८८ सावंतवाडी रोड-छत्रपती शिवाजी महाराज टर्मिनस एक्स्प्रेस या नावाने दररोज धावणार आहे. या गाडीचे सविस्तर वेळापत्रक भारतीय रेल्वेकडून लवकरच जाहीर करण्यात येणार आहे.
सुमारे ५१० किलोमीटर अंतरावरील या मार्गामुळे मुंबई महानगर क्षेत्र आणि कोकणातील प्रमुख शहरांदरम्यान थेट, सुरक्षित आणि विश्वासार्ह रेल्वे संपर्क उपलब्ध होणार आहे. पर्यटन, शिक्षण, रोजगार, व्यापार तसेच सणासुदीला गावी जाणाऱ्या हजारो प्रवाशांना या नव्या सेवेचा मोठा लाभ होईल. कोकण किनारपट्टीवरील समुद्रकिनारे, ऐतिहासिक किल्ले, धार्मिक स्थळे आणि निसर्ग पर्यटन स्थळांपर्यंत पोहोचणे अधिक सुलभ होणार असून पर्यटन उद्योगाला नवी चालना मिळेल. विद्यार्थी, नोकरदार, व्यापारी आणि नियमित प्रवाशांसाठी ही सेवा मोठी सोय ठरणार आहे. वाढलेली प्रवासी क्षमता आणि सुधारलेली कनेक्टिव्हिटी यामुळे कोकणातील स्थानिक अर्थव्यवस्था आणि व्यवसायालाही गती मिळण्याची अपेक्षा आहे.
नव्या दैनिक एक्स्प्रेसचे प्रस्तावित थांबे :
छत्रपती शिवाजी महाराज टर्मिनस, दादर, ठाणे, पनवेल, पेण, रोहा, माणगाव, वीर, खेड, चिपळूण, सावर्डा, अरवली रोड, संगमेश्वर रोड, रत्नागिरी, अडावली, वालिवाडे, राजापूर रोड, वैभववाडी रोड, नांदगाव रोड, कणकवली, सिंधुदुर्ग, कुडाळ आणि सावंतवाडी रोड.
CSMT Sawant Wadi Road Express
About Author
