कल्याणमध्ये नारायण राणें विरोधात पेटून उठली शिवसेना; तीव्र आंदोलनात पुतळा, चपला आणि कोंबड्या

केंद्रीय मंत्री नारायण राणे आणि शिवसेना यांच्या मध्ये मागील काही दिवसांपासून शाब्दिक चकमकी सुरू होत्या. मात्र आता हा वाद विकोपाला गेला असून टीकेची पातळी देखील खालावताना दिसतेय. राणेंच्या वादग्रस्त वक्तव्यानंतर शिवसेनेकडून निषेध व्यक्त करण्यासाठी महाराष्ट्रभर तीव्र आंदोलने केली जात आहेत. कल्याण मध्येही विविध ठिकाणी शिवसैनिकांनी तीव्र आंदोलने करीत राणेंच्या वक्तव्याचा निषेध व्यक्त केला.

एकेकाळचे शिवसेनेचे मुख्यमंत्री नारायण राणे ते भाजपाचे केंद्रीय मंत्री असा राजकीय प्रवास केलेले नारायण राणे हे नेहमीच चर्चेत असतात. अलीकडे जन आशीर्वाद यात्रेवर असल्यापासून राणे आणि शिवसेना यांच्यात शाब्दिक चकमकी सुरू होत्या. शेवटी वादग्रस्त वक्तव्य केल्याबद्दल शिवसैनिकांनी राज्यभर आंदोलने केली आहेत. कल्याण मध्ये शिवसेनेचे मोठे वर्चस्व असल्याने या शहरात देखील या आंदोलनाचे तीव्र असे पडसाद उमटले आहेत. शहरातील ठिकठिकाणी रस्त्यावर उतरून ही आंदोलने करण्यात आली.

कल्याण मध्ये शिवसेनेकडून आंदोलन करण्यात आले. ज्यात शिवसेनेच्या कार्यकर्त्यांनी भाजपच्या एका कार्यालयाचे नुकसान केल्याचे समोर आले. डोंबिवलीत देखील शिवसेनेकडून राणे यांच्या प्रतिकात्मक पुतळ्याला जोडेमार आंदोलन केले. तर दुसरीकडे शरद पाटील यांच्या नेतृत्वाखाली कल्याण पूर्वेत शिवसेना शाखेसमोर राणें विरोधात घोषणाबाजी करीत रोष व्यक्त करण्यात आला. तर माजी नगरसेवक महेश गायकवाड यांच्या कार्यालयाबाहेरही शिवसैनिक एकवटले होते. यावेळी नारायण राणेंच्या प्रतिकात्मक पुतळ्याला चपलांचा झोड देण्यात आला. तसेच या आंदोलनात कोंबड्या दाखवून निषेध करण्यात आला.

एकीकडे इंधनाचे दर आणि महागाई प्रचंड वाढली आहे आणि हे जन आशीर्वाद यात्रा काढत आहेत. या जन आशीर्वाद यात्रा नसून जन शाप यात्रा आहेत. नारायण राणे आणि त्यांच्या पुत्रांनी कल्याण मध्ये येऊन यात्रा काढून दाखवाव्यात असे खुले आव्हान महेश गायकवाड यांनी राणे यांच्यावरील रोष व्यक्त करताना दिले आहे. तर माजी मुख्यमंत्री देवेंद्र फडणवीस यांनी भाजप राणेंच्या पाठीशी असल्याचे सांगितले. मात्र नारायण राणेंनी केलेल्या वक्तव्याला भाजपचे समर्थन नसल्याचे देखील त्यांनी स्पष्ट केलं. त्याचबरोबर भाजप कार्यालयाची नुकसान करणाऱ्यांवर पोलिसांनी कारवाई करावी अशी मागणी त्यांनी केली आहे.

नारायण राणें विरोधात तक्रार दाखल झाल्यानंतर त्यांना अटक करण्यासाठी पोलीस रवाना झाले. याचदरम्यान राणे यांनी अटकपूर्व जामीन देखील केला होता. मात्र न्यायालयाने राणे यांचा जामीन अर्ज फेटाळल्या नंतर पोलिसांनी आता नारायण राणेंना अटक केली आहे.

-संतोष दिवाडकर

लसीकरणाच्या बाबतीत कल्याण पूर्वेशी दुजाभाव ? पालिका प्रशासनावर सामाजिक संघटनांचा रोष

कल्याण पुर्वेचा भाग हा महापालिका क्षेत्रातील इतर भागांच्या तुलनेत विकासापासून वंचित राहिला आहे अशी एक नेहमीची ओरड आहे. कल्याण पूर्वेला स्वतंत्र आमदार आहे. दोन महापौरही याच भागात होऊन गेले. कोटींच्या महागड्या गाड्या घेणारे तसेच अनेक नामांकित बांधकाम व्यावसायिक कल्याण पूर्वेत राहतात. मात्र कोरोना काळात या कल्याण पूर्वेत लसीकरण केंद्रे जर पहायला गेलात तर कधी चार तर कधी कधी एकच केंद्र दिलं जातं. इतर परिसराच्या मानाने लोकसंख्या ही ४ लाखांच्या वर आहे त्यामुळे पालिका प्रशासन आणि लोकप्रतिनिधी विरोधात सामाजिक संघटना रोष व्यक्त करताना दिसत आहेत.

कल्याण डोंबिवली महापालिकेच्या वतीने सर्वसामान्य नागरिकांसाठी लसीकरण केंद्रे उभारण्यात आली आहेत. एकूण २४ केंद्र तर काही वेळेस १९ उभारली जातात. मात्र त्यात कल्याण पूर्वेला झुकते माप देऊन जेमतेम तीन ते चार केंद्रे दिली जातात. काही दिवशी तर १९ पैकी एकच लसीकरण केंद्र कल्याण पूर्वेत दिले जाते. त्यामुळे विकासाच्या बाता मारणारे नगरसेवक आणि लोकप्रतिनिधी आणि बाकीचे राजकीय पक्ष आहे कुठे असा संतप्त सवाल सामाजिक संघटना उपस्थित करत आहेत.

१९ केंद्रावर लसीकरण होत असताना

कल्याण पूर्व – १
कल्याण पश्चिम – ६
डोंबिवली मधे – ११
टिटवाळा – १

अशी केंद्र कधी कधी पालिका प्रशासन देते. आणि त्यामुळे कल्याण पूर्वेतील नागरिकांना कल्याण पश्चिम किंवा डोंबिवली मध्ये जावे लागत आहे. त्यात लसीच्या दुसऱ्या मात्रेसाठी पूर्वेकर मोबाईल लसीकरणाची वाट पाहूनही थकले आहेत.

लसीकरण सुरू झाल्यापासून असेच सुरू आहे. हे कल्याण पूर्वेला भिक दिल्या प्रमाणे लसीकरण केंद्र देत असतात हा अन्याय आहे. कल्याण पूर्वेचे लोक अतिशय शांत सुस्वभावी आहेत. आपल्या पक्षाला, माणसाला मतदान करणारे आहेत. याचा गैर फायदा प्रशासन घेत आहे की काय ? डोंबिवली चे विशेष कौतुक कारण ते मात्र बरोबर मिळवतात सर्व काही.

– उदय रसाळ (माजी नगरसेवक)

दरम्यान आरोग्य अधिकारी डॉ अश्विनी पाटील यांना याबाबत प्रतिक्रिया घेण्यासाठी संपर्क केले असता कल्याण पूर्व साठी फिरते लसीकरण केंद्रे उभारण्यात आले असल्याचे त्यांनी सांगितले. तसेच कल्याण डोंबिवली परिसरात केंद्रे उभारण्याचे काम उपायुक्त पल्लवी भागवत यांच्या कडे आहेत असे स्पष्ट केले. भागवत यांना संपर्क केला असता त्यांना फोनचा स्वीकारच करता आला नाही. त्यामुळे त्यांची प्रतिक्रिया मिळू शकलेली नाही.

-रोशन उबाळे

कल्याण पुर्वेत रक्षाबंधना निमित्त धर्मवीर आनंद दिघे उद्यानात वृक्षारोपण; “रक्षा वृक्षांची” दिला संदेश

आरक्षित भुखंडावर होणारे अतिक्रमण रोखण्यासाठी आयुक्त डॉ. विजय सूर्यवंशी यांनी आरक्षित भुखंडाच्या सीमेवर झाडे लावून  भुखंड सुरक्षित ठेवण्याबाबत निर्देश दिले असल्याने आरक्षित भुखंडावर झाडे लावण्यात येत आहेत. कल्याण पुर्वीतील “ड” प्रभाग क्षेत्रातील आमराई विजय नगर परिसरातील धर्मवीर आनंद दिघे उद्यान या आरक्षित भुखंडावर विदर्भ युवक मंडळ यांच्या आयोजना नुसार रक्षा बंधन व नारळीपोर्णिमेचे औचीत्त साधुन विभागीय उप आयुक्त अनंत कदम यांच्याहस्ते वृक्षरोपण करण्यात आले. याप्रसंगी “ड” प्रभागक्षेत्र आधिकारी सुधीर मोकल, स्थानिक नगरसेविका माधुरी काळे, माजी नगरसेवक प्रशांत काळे आदी मान्यवर उपस्थित होते.

कल्याण पूर्व मध्ये रक्षाबंधन दिवशी वृक्षरोपण कार्यक्रमाचे आयोजन करण्यात आले होते. वृक्षांची रक्षा करणे हे आजच्या निसर्गाच्या नियमांची गरज भासली आहे. वृक्षतोडीमुळे अनेक ठिकाणी निसर्गाचा नियम पायमल्ली झाल्यामुळे जीवित हानी पासून सृष्टीची हानी देखील सुरू आहे, माणसाने आपल्या सोयीनुसार अनेक बांधकामं, रस्ते तयार केलेत  आणि भरमसाठ वृक्षतोड झाली. ऑक्सिजनची कमतरता शहरांमध्ये भासत आहे. याकरिता सृष्टी रक्षा हेच “रक्षाबंधन व्हावं” या उद्देशाने कल्याण पूर्व मध्ये माधुरी प्रशांत काळे यांनी  सामाजिक संस्थेसोबत वृक्षारोपण घेवून मोलाचे कार्य केले आहे.

या भव्य वृक्षारोपण कार्यक्रमात प्रभागातील नागरिकांनी नगरसेविका माधुरी काळे यांनी स्वेच्छेने  वृक्षारोपणासाठी झाडे ,फुलझाडे देण्याच्या मागणीस चांगला प्रतिसाद दिला. नागरिकांनी दिलेली ही झाडे त्यांच्या नावाने लावण्यात येणार आहेत. यावेळी ड प्रभाग अधीक्षक संजय कुमावत, विदर्भ युवक मंडळाचे संस्थापक पी. डी. चौधरी, अध्यक्ष उत्तम पाटील, सचिव सुरेश ढगे, विश्वस्थ विजय गैगावली, सुरेखा कपले, कासार, सिद्धिविनायक सामाजिक संस्थेच्या संचालिका सुरेखा गौरे, आशा चौधरी, विजय नगर हौसिंग फेडरेशनचे सचिव प्रदीप तांबे, खजिनदार, वासुदेव कदम, संचालक कानसे, संभाजी माने, नरेश कासार, किरण गौरे, विनय ठोकळे आदींसह नागरिक उपस्थित होते.

-कुणाल म्हात्रे

खासदार डॉ. श्रीकांत शिंदे यांनी कुस्तीच्या खेळाडूंना उपलब्ध करून दिली आंतरराष्ट्रीय दर्जाची मॅट

कल्याण पूर्व भागातील नांदिवली परिसरातील जय बजरंग तालीम संघाला खासदार डॉ श्रीकांत शिंदे यांनी कुस्ती खेळण्यासाठी आंतरराष्ट्रीय दर्जाची मॅट दिली आहे. कल्याण मधील नांदीवली गावात असलेल्या जय बजरंग तालीम संघाने आजवर अनेक कुस्ती खेळाडू घडवले आहेत. आधी कुस्ती मातीत खेळली जात होती. आता वेळ आणि काळ बदलला असून स्पर्धा  वाढली आहे. त्यासाठी मॅट उपलब्ध करुन देण्याची मागणी खासदार डॉ श्रीकांत शिंदे यांच्याकडे  नांदवली गावचे माजी सरपंच रामदास ढोणे, पंढरीनाथ ढोणे व खेळाडूंनी केली होती.

 या मॅटचे खासदार श्रीकांत शिंदे यांच्या हस्ते लोकार्पण झाले. यावेळी मुलांनी मॅटवर कुस्तीची प्रात्याक्षिके दाखविली. या मॅटवर उत्तम सराव करुन उत्तम खेळाडू घडतील. केवळ महाराष्ट्रात नाही तर भारताच्या बाहेर नाव कमाविण्यासाठी त्यांना उर्जा व प्रशिक्षण मिळेल असा विश्वास खासदार डॉ. श्रीकांत शिंदे यांनी व्यक्त केला आहे. तसेच जय बजरंग तालीम संघाच्या व्यायाम शाळेच्या जागेत कुस्तीगीरांना आणि परिसरातील नागरिकांना नियमित व्यायामाकरिता लागणारे व्यायामशाळा साहित्य देखील उपलब्ध करुन दिले जाईल, अशी ग्वाही त्यांनी यावेळी दिली.

या लोकर्पण कार्यक्रमाप्रसंगी कल्याण डोंबिवली कुस्तीगीर संघ अध्यक्ष पंढरीनाथ ढोणे, उल्हासनगर महापालिका गटनेता धनंजय बोडारे, तालुकाप्रमुख अशोक म्हात्रे, कल्याण पंचायत समिती माजी सभापती सदाशिव गायकर, माजी नगरसेवक महेश गायकवाड, मारुती पाटील, विभागप्रमुख रामदास ढोणे, मदन चिकणकर, उपमहाराष्ट्र केसरी व आंतरराष्ट्रीय कुस्तीगीर युवराज वाघ  तसेच कल्याण व ठाणे जिल्ह्यातील कुस्तीगीर व वस्ताद उपस्थित होते.

-कुणाल म्हात्रे

आपल्याच पोलीस ठाण्यातील सहकाऱ्याला अटक करण्याची डोंबिवलीच्या पोलिसांवर आली वेळ; गंभीर दुष्कृत्य केल्याने हवालदार निलंबित

डोंबिवलीच्या राम नगर पोलीस ठाण्यातील एका पोलीस हवालदाराने एका अल्पवयीन मुलीचा विनयभंग केल्याचा धक्कादायक प्रकार उघडकीस आला आहे. त्यामुळे शेतच जर कुंपण खायला लागले तर सामान्य नागरिकांनी जायचे कोणाकडे असा प्रश्न पडला आहे. या अगोदर सचिन वझे आणि पोलीस आयुक्त परमवीर सिंग यांच्या गाजलेल्या प्रकरणा मुळे पोलीस खात्यावर विविध प्रश्न उपस्थित राहिले होते. त्यातच डोंबिवलीतील घटनेने पुन्हा पोलीस खाते वाईट गोष्टीसाठी चर्चेत आले आहे.

पीडितेच्या आईने दिलेल्या तक्रारी नंतर राम नगर पोलीस ठाण्यात गुन्हा दाखल करण्यात आला असून. दुष्कृत्य करणाऱ्या पोलीस हवालदाराला अटक करण्यात आली आहे. ज्या रामनगर पोलीस ठाण्यात तो कार्यरत होता त्याच पोलीस ठाण्याने त्याला अटक केली आहे. सतीश कारले असे या पोलीस हवालदाराचं नाव असून आता त्याच पोलीस सेवेतून निलंबन करण्यात आलं आहे.

या घटनेमुळे कल्याण डोंबिवलीत एकच खळबळ उडाली आहे. पोलीस अधिकारी भीमराव घाडगे यांनी विविध कलमा अन्वये या पोलिस हवालदारावर गुन्हे दाखल केले आहेत. अश्या निकृष्ठ वृत्तीच्या पोलिसांमुळे समाजातील इतर चांगल्या व इमानदार पोलिसांना देखील नाईलाजास्तव खाली मान घालावी लागते. त्यामुळे संपूर्ण पोलीस खात्यावर प्रश्नचिन्ह उठण्या पूर्वी अशा वृत्तीच्या पोलिसांचा निकाल लावणे गरजेचे ठरू लागले आहे.

-रोशन उबाळे

अरेच्चा! एवढे मोठे केंद्रीय राज्यमंत्री आणि एवढीशा खुर्चीसमोर नतमस्तक ? कपिल पाटलांनी असं का केलं बरं ?

पंतप्रधान नरेंद्र मोदी यांच्या केंद्रीय राज्यमंत्रीमंडळात निवड झाल्यानंतर नवनिर्वाचित मंत्र्यांची जन आशीर्वाद यात्रा काढण्यात आली होती. यातच संपूर्ण ठाणे जिल्ह्यात केंद्रीय मंत्री कपिल पाटील यांनी पाच दिवस भेटी दिल्या. याचदरम्यान शेवटच्या दिवशी यात्रेची सांगता झाल्यानंतर त्यांनी एका खुर्चीला वंदन करून तिच्यासमोर ते नतमस्तक झाले. यानंतर त्यांनी असे का केले ? याबद्दल काही लोक अनभिज्ञ आहेत.

राजकारण असोत किंवा इतर कोणतेही क्षेत्र प्रत्येकाची सुरुवात ही तळा गाळातून आणि शून्यातूनच होत असते. आणि शून्यातुन सुरुवात करून केंद्रीय राज्यमंत्री पद मिळवणारे कपिल पाटील हे देखील त्यातीलच एक. कपिल पाटील यांनी ज्या खुर्चीला वंदन केले ती केंद्रीय खुर्ची नसून ज्या खुर्चीने त्यांना घडवलं ती ही खुर्ची होती. राजकारणात पहिलं मिळालेलं मोठं यश म्हणजे हीच खुर्ची जिला कपिल पाटील यांनी विनम्रपणे हात जोडले. ती खुर्ची होती सरपंच पदाची. म्हणूनच कपिल पाटील यांनी कुटुंबातील लोकांना घेऊन थेट ग्रामपंचायत कार्यालय गाठले.

कपिल पाटील यांनी राजकारणात प्रवेश केला त्यावेळी म्हणजेच १९८८ मध्ये ते दिवे अंजूर गावासाठी ग्रामपंचायत निवडणूक लढवत होते. आणि याच गावचे ते सरपंच बनले होते. सरपंच पदाच्या लहान मात्र गावात प्रचंड मान असणाऱ्या खुर्चीवरून कपिल पाटील यांचा राजकीय प्रवास सुरु झाला होता. या खुर्चीवरून पुढे एवढा मोठा प्रवास होईल असे त्यांनी स्वप्नात देखील पाहिले नव्हते. सरपंच कपिल पाटील ते केंद्रीय मंत्री कपिल पाटील हा प्रवास ज्या खुर्चीमुळे शक्य झाला त्या खुर्चीला मी कधीही विसरणार नाही अशी भावना त्यांनी यावेळी व्यक्त केली आणि त्यांना गहिवरून आले. आयुष्यात कितीही उंची गाठा पण पहिल्या पायरीला कधीही विसरू नका असा संदेश कपिल पाटलांनी यातून लोकांना दिला आहे. यातून कपिल पाटील हे किती भावनिक आहेत याचाच एक प्रत्यय लोकांना आला आहे.

-संतोष दिवाडकर

ईव्हीएम मशीन हॅकिंग प्रकरणाची चौकशी करा; शिवसेना नेत्यांनी केली मागणी

कल्याणमध्ये सॉफ्टवेअर इंजिनिअर म्हणून कार्यरत असलेल्या एका व्यक्तीचा ईव्हीएम मशीन हॅक केल्याचा दावा करणारा व्हिडीओ व्हायरल झाला होता. याबाबत भाजप आमदार गणपत गायकवाड यांनी कोळशेवाडी पोलीस ठाण्यात धाव घेत तक्रार नोंदवली होती. मात्र आता त्यापाठोपाठ शिवसेनेने देखील या वादात उडी घेतली आहे. शिवसेनेचे कल्याण जिल्हाप्रमुख गोपाळ लांडगे यांनी पोलीस उपायुक्त विवेक पानसरे यांची भेट घेत हा गंभीर प्रकार असून सर्व यंत्रणेच्या प्रतिष्ठेचा प्रश्न आहे. त्यामुळे याप्रकरणी चौकशी करत दोषींवर कारवाई करण्याची मागणी केली . त्यामुळे या प्रकरणाला वेगळे वळण मिळण्याची शक्यता वर्तवण्यात येत आहे.

व्हायरल होत असलेल्या व्हडिओमध्ये आशिष चौधरी नामक इसम आमदार गणपत गायकवाड हे ईव्हीएम हॅक करून निवडुन आल्याचा दावा करताना दिसत आहे. आणि हीच व्हिडियो सध्या सोशल मीडियावर मोठ्या प्रमाणात व्हायरल झाल्याने एकच खळबळ उडाली आहे. हे स्टिंग असल्याचा दावा देखील करण्यात आलाय. या व्हायरल व्हिडियो स्टिंगमध्ये दिसणारा तरुण हा आमदार गणपत गायकवाड यांच्याकडे कामाला होता. त्यांच्या मुलाची जवळपास ४० लाखांची फसवणूक केल्या प्रकरणी सध्या तो न्यायालयीन कोठडीत आहे. आशिष चौधरी याने १९ मे रोजी मुंबई उच्च न्यायालय, पोलीस महा संचालक आणि संबंधी सरकारी यंत्रणांना तक्रार केली आहे. त्याच मे महिन्यातील हा व्हिडियो असून २०१९ च्या कल्याण पूर्व विधान सभेत काही ठिकाणी ईव्हीएम हॅक केल्याचा दावा केला आहे आणि याबदल्यात ५० लाख रुपये मिळाले होते असे त्याने म्हटले आहे.

आमदार गणपत गायकवाड यांनी या सर्व आरोपांचे खंडन करत या व्हिडियोत दावा करणाऱ्या आशिष चौधरीने आपल्या मूलाची ४० लाखांची फसवणूक केल्या प्रकरणी गुन्हा दाखल करून तो अटकेत असल्याचे स्पष्ट केले. तसेच मला बदनाम करण्याचं हे षड्यंत्र असून या व्हिडियोची सत्यता तपासून दोषींवर कठोर कारवाई करा अशी मागणीही आमदार गायकवाड यांनी केली आहे. मात्र आता या प्रकरणात शिवसेनेने देखील उडी घेतली आहे. शिवसेना कल्याण जिल्हाप्रमुख गोपाळ लांडगे, आमदार गायकवाड यांचे प्रतिस्पर्धी उमेदवार धनंजय बोडारे यांच्या समवेत पोलीस उपयुक्ताची भेट घेत त्यांना याप्रकरणी चौकशी करून दोषींवर कारवाई करण्याची मागणी केली आहे.

आतापर्यंत आमदारांनी मशीन मध्ये घोळ केल्याची शंका होती मात्र आता या क्लिप मुळे ते स्पष्ट झाल्याचा आरोप लांडगे यांनी केला आहे. सुरुवातीपासूनच ईव्हीएम मशीनमधून चुकीचे काम केले जात असल्याची सर्व पक्षीय राजकारण्यांची ओरड सुरू आहे. ईव्हीएम मशीन मधील गोंधळामुळे चुकीचा निर्णय लागला आहे. मतदार आणि प्रतिस्पर्धी उमेदवाराच्या डोळ्यात धूळफेक करत त्यांची फसवणूक करण्यात आल्याचे समोर आले आहे. याचा कायदेशीर ब होणे गरजेचे आहे यासाठी शुक्रवारी पोलिस उपायुक्तांना निवेदन दिल्याचे त्यांनी सांगितलं.

ईव्हीएम मशीन हॅक करणे हा देशद्रोह आहे आणि चौधरी याने आपण पैशासाठी हे काम केल्याची कबुली दिली आहे. सर्व यंत्रणेच्या प्रतिष्ठेचा हा प्रश्न असल्याने यातील दोषींवर गुन्हा दाखल करत कायदेशीर कारवाई करण्याची मागणी धनंजय बोडारे यांनी केली आहे. आतापर्यंत १३५ करोड लोकांच्या आणि राजकारण्यांच्या मनात असलेल्या संशयाला आणि चर्चेला हॅकरने सिद्ध करून दाखवले आहे. लोकशाही वर विश्वास असून आपण याप्रकरणी पोलीस, निवडणूक आयोगाकडे तक्रार केली असून संबंधित यंत्रणा चौकशी करून न्याय देतील असा विश्वास गोपाळ लांडगे ( कल्याण जिल्हा प्रमुख) यांनी व्यक्त केला आहे.

-रोशन उबाळे

११ वी ऑनलाईन प्रवेश प्रक्रियेत ओबीसी, एनटी, एसबीसी विद्यार्थ्यांवर अन्याय; माजी आमदाराचा आंदोलनाचा पवित्रा

११ वी ऑनलाईन प्रवेशप्रक्रियामध्ये ओबीसी, एन टी, व्हीजेएनटी, आणि एसबीसी विद्यार्थ्यांना नॉन क्रिमिलिअरची सक्ती केली जात असून यामध्ये तातडीने बदल करावा अन्यथा राज्यात तीव्र आंदोलन केले जाईल असा इशारा माजी आमदार व भाजपा भटके विमुक्त आघाडीचे प्रदेश संयोजक नरेंद्र पवार यांनी शासनाला दिला आहे. याबाबत नरेंद्र पवार यांनी मुख्यमंत्री उद्धव ठाकरे, शिक्षणमंत्री वर्षा गायकवाड यांना आज निवेदन पाठवून ही मागणी केली आहे.

      मुंबई एमएमआर क्षेत्रासह राज्यातील अन्य भागात ११ वी ऑनलाईन प्रवेश प्रक्रिया सुरू आहे. ऑनलाईन प्रवेश प्रक्रियेमध्ये नॉन क्रिमिलियर प्रमाणपत्र देण्याची विद्यार्थ्यांना सक्ती केली जात असून याचा फटका राज्यातील ओबीसी, एसबीसी, व्ही जे एन टी तसेच एन टी विद्यार्थ्यांना बसत आहे. ऑनलाईन फॉर्म भरण्याची मुदत ३० ऑगस्ट असल्याने एव्हड्या कमी कालावधीत नॉन क्रिमिलियर प्रमाणपत्र मिळविण्यासाठी पालकांना मोठी कसरत करावी लागणार आहे. तर अनेक विशेष प्रवर्ग, एन टी, व्ही जे एन टी, व ओबीसी प्रवर्गातील विद्यार्थ्यांना खुल्या गटातून प्रवेश घ्यावा लागणार असून हा विद्यार्थ्यांवर अन्याय ठरणार आहे.

वास्तविक पाहता मागील वर्षी अशा प्रमाणपत्राची कोणतीही अट शालेय शिक्षण विभागाने टाकली नव्हती. यंदा देखील कोरोनाचा काळ पाहता नॉन क्रिमिलिअर ची सक्ती करण्यात येऊ नये. प्रवेश प्रक्रिया झाल्यानंतर नॉन क्रिमिलिअरचे प्रमाणपत्र विद्यार्थी देऊ शकतात. याबाबतीत तातडीने निर्णय घेऊन एन टी, व्ही जे एन टी, एसबीसी व ओबीसी विद्यार्थ्यांना न्याय देण्यात यावा अन्यथा नाईलाजास्तव या अन्यायाविरोधात शालेय शिक्षण विभागाच्या विरोधात आंदोलन करावे लागेल असा इशारा नरेंद्र पवार यांनी शासनाला दिला आहे.

-कुणाल म्हात्रे

जन आशीर्वाद यात्रेमुळे भाजप पदाधिकार्यांवर गुन्हे दाखल मग राष्ट्रवादीच्या नेत्यांवर का नाही? उठवला जातोय सवाल

केंद्रीय राज्यमंत्री कपिल पाटील यांनी काढलेल्या जन आशीर्वाद यात्रे संदर्भात कोरोना काळात गर्दी जमावल्या प्रकरणी कल्याण डोंबिवली च्या विविध पोलीस ठाण्यात गुन्हे दाखल झाले आहेत. यातील मानपाडा पोलीस ठाण्यात देखील काही पदाधिकार्यांविरोधात गुन्हे दाखल करण्यात आले आहेत. मात्र सर्वपक्षीय संघर्ष समितीच्या असलेल्या राष्ट्रवादी कॉग्रेस पक्षाच्या पदाधिकार्यांवर गुन्हे का दाखल झाले नाहीत असा सवाल सध्या विचारला जात आहे.

केंद्रीय राज्य मंत्री कपिल पाटील यांच्या स्वागतचा कार्यक्रम मानपाडेश्वर मंदिर येथे घेऊन कोरोना काळात गर्दी जमवील्या प्रकरणी गुन्हे का दाखल नाहीत ? असा प्रश्न विचारला जाऊ लागला आहे. आगरी समाजातुन असलेल्या कपिल पाटील यांचा सत्कार सर्वपक्षीय संघर्ष समितीच्या आगरी समाजाच्या नेत्यांनी मानपाडेश्वर मंदिर येथे घेऊन गर्दी जमवून देखील या बाबत गुन्हे का नोंद झाले नाहीत? हा वादाचा विषय ठरला आहे. सर्वपक्षीय संघर्ष समिती व राष्ट्रवादीचे नेते असलेल्या गुलाब वझे व दत्ता वझे यांनी या कार्यक्रमाचे आयोजन केले होते. या कार्यक्रमाची पोलिसांना माहिती नव्हती का? की डोळेझाक केली जात आहे? अशाप्रकारे दुजाभाव केला जात असल्याने नागरिकांत पोलिसांच्या भूमिकेबद्दल संताप व्यक्त केला जात आहे. एकाला एक न्याय आणि त्याच प्रकरणात दुसऱ्याला दुसरा न्याय हे खरंच खेदजनक आणि निषेधार्थ आहे. असा सूर उमटला जात आहे.

कोरोना महामारीची दुसरी लाट पूर्णपणे ओसरली नसून शासनाने सर्वाना नियमाचे पालन करणे बंधनकारक असल्याचे जाहीर केले आहे. नियमांचे उल्लंघन करणाऱ्या राजकीय पक्षांच्या नेतेमंडळी आणि कार्यकर्त्यांवर कारवाई केली जात आहे. भाजपने डोंबिवलीत जनआशीर्वाद यात्रा काढून नियम पायदळी तुडवल्याने मानपाडा पोलीस ठाण्यात गुन्हे दाखल करण्यात आले आहे. महाराष्ट्र शासनाने जाहीर केलेल्या आदेशाचे पालन बंधनकारक असताना यात्रेत मनाई आदेशाचे उल्लंघन करत लोकांना एकत्र जमा करणे, मास्क चा वापर न केल्याने ४३६/२०२१ भा.द.वी.कलम १८८,२६९,२७० सह साथीचा रोग कायदा १८९७ चे कलम २,३,४ सह आपत्ती व्यवस्थापन कायदा कलम ५१ ( ब ) महा. पो.अधि.सन १९५१ चे कलम ३७ ( १ ) १३५ प्रमाणे आयोजकांवर मानपाडा पोलीस ठाण्यात गुन्हे दाखल झाले आहेत.

१८ ऑगस्ट रोजी सायंकाळी साडे सात वाजण्याच्या सुमारास  जन आशीर्वाद कार्यक्रमा वेळी डोंबिवली नागरीक सहकारी बँक चौक, सोनारपाडा कल्याण शिळ रोड येथे जन आशीर्वाद यात्रा काढून नियमांचे पालन न केल्याप्रकरणी  भाजप पदाधिकारी मोरेश्वर भोईर, नंदू परब, शशिकांत कांबळे, संजय उर्फ बबलू तिवारी, दत्ता माळेकर व इतर पदाधिकारी  व कार्यकर्त्यांवर गुन्हे दाखल झाले आहेत. मग बाकीच्यांना वेगळा न्याय का ? अशा चर्चा सध्या नागरिकांमध्ये तसेच राजकिय वर्तुळात सुरू आहेत.

-रोशन उबाळे

घरफोडी करणारा टिटवाळ्यातील १९ वर्षीय सराईत आरोपी पोलिसांच्या हिरासतीत; कल्याण क्राईम ब्रांचने फेकलं जाळं

टिटवाळा येथे राहणाऱ्या एका १९ वर्षीय युवा आरोपीला कल्याण क्राईम ब्रांचने बुधवारी जाळं पसरून अटक केली. अत्यंत शिताफीने केलेल्या या शोधात हा आरोपी पोलिसांच्या हाताला लागला असून त्याच्या कडून काही ऐवज हस्तगत करण्यात आलेला आहे.

तमन उर्फ नरेंद्र बाबू भंडारी हा १९ वर्षीय युवक सराईत आरोपी असून तो घरफोडी आणि चोऱ्या माऱ्या करीत होता. गुन्हे शाखा ३ कल्याणचे पोलीस अधिकारी व अंमलदार यांनी गुप्त बातमीदाराच्या मदतीने संशयित आरोपीची माहिती काढली. त्यानंतर गोपनीयपणे ओळख पटवून त्याचा शोध घेतला आणि त्याला ताब्यात घेतले. आरोपीची सखोल चौकशी केली असता त्याच्याकडे ३८ हजार रुपये किंमतीचे ६ मोबाईल फोन सापडले. त्याचप्रमाणे विविध ठिकाणी घरफोडी केली असल्याचे त्याने चौकशीत मान्य केले. यासाठी त्याला डोंबिवलीच्या मानपाडा पोलीस ठाण्यात हजर करण्यात आले.

या कारवाईत वरिष्ठ पोलिसांच्या मार्गदर्शनाखाली गुन्हे शाखा घटक ३, कल्याणचे पोलीस निरीक्षक विलास पाटील, सहाय्यक पोलीस निरीक्षक भूषण दायमा, पोलीस उपनिरीक्षक, मोहन कळमकर, सहाय्यक पोलीस उपनिरीक्षक साळुंखे, विलास मालशेटे, दत्ताराम भोसले, सचिन साळवी, राजेंद्र खिलारे, मंगेश शिर्के, सुरेश निकुळे, प्रकाश पाटील, हरिश्चंद्र बांगरा, पोलीस शिपाई अजितसिंग राजपूत, सचिन वानखेडे, मिथुन राठोड, गुरुनाथ जरग, गोरक्ष शेकडे, राहुल ईशी आदींचे महत्त्वाचे योगदान आहे.

-संतोष दिवाडकर