आमदार गणपत गायकवाड यांची वचनपूर्ती; विधान सभा क्षेत्रातील नागरिकांच्या लसीकरणाला सुरुवात.

कल्याण पुर्वचे भाजप आमदार गणपत गायकवाड यांनी कोरोना काळात आपल्या मुलाच्या लग्नाचा अवास्तव खर्च टाळून त्या खर्चातून विधानसभा क्षेत्रातील नागरिकांसाठी लसीकरणाची मोहीम राबवली आहे. हि मोहीम तीन दिवसीय असून नागरिकांचा उत्स्फूर्त प्रतिसाद या लसीकरण मोहिमेला मिळत आहे.

कोरोना काळात सर्वत्र लसीकरण सुरु असतानाही कल्याण डोंबिवली महानगरपालिका क्षेत्रातील आरोग्य केंद्रावरील लसीकरणावर पुरेसा साठा होत नाही. तर दुसर्या बाजूस विविध खाजगी इस्पितळात आपल्या खिशातले सातशे ते आठशे रुपये खर्च करून लोकांचे लसीकरण होत आहे. या सर्व बाबींचा सकारात्मक विचार करून कल्याण पूर्वचे आमदार गणपत गायकवाड यांनी कोरोना काळातील निर्बंधामुळे त्यांच्या मुलाचा अवास्तव खर्च टाळून स्व खर्चातील काही भाग म्हणून कल्याण पूर्व विधानसभा क्षेत्रातील नागरिकांना मोफत लसीकरणाची सुविधा उपलब्ध करुण दिली. आणि याचप्रकारे आमदार गणपत गायकवाड यांनी वचनपूर्ती करुन सर्वसामन्य नागरिकांना काहीसा दिलासा दिला आहे. सोमवारी या लसीकरणाचे उद्घाटन आमदार गणपत गायवाड यांनी केलं.

लसीकरण प्रसंगी भारतीय जनता पार्टीचे कल्याण पूर्व मंडळचे अध्यक्ष संजय मोरे, माजी उपमहापौर मोरेश्वर भोईर, माजी नगरसेवक मनोज राय, यांच्यासह इतर भाजप कार्यकर्ते पदाधिकारी उपस्थित होते. हि मोहीम 3 दिवसीय असून ही लस दिव्यांग व्यक्ती, पत्रकार, रिक्षा चालक, तृतीय पंथीय, नाभिक व्यवसायिक, विधवा महिला यांना देण्यात येणार आहे.या मोहिमेत नागरिकांचे उत्स्फूर्त प्रतिसाद पाहायला मिळतोय. यानंतर मोहिमेत टप्पा टप्याने १००० असे नागरिकांचे लसीकरण राबिवण्यात येणार आहे व या पुढे देखील अश्या प्रकारे लसीकरण करण्यात येईल असे आश्वासन आमदार गणपत गायकवाड यांनी दिले.

-संतोष दिवाडकर

स्वातंत्र्याच्या ७४ वर्षांनंतरही आदिवासी पाडे मुलभूत सोयी सुविधांपासून वंचित?

स्वातंत्र्याच्या ७४ वर्षांनंतर देखील आदिवासी पाडे मुलभूत सोयी सुविधांपासून वंचितच असून आदिवासी क्षेञ आढावा समीतीचे अध्यक्ष विवेक पंडित यांनी कल्याण तालुक्यातील आदिवासी पाड्यांची आदिवासी दिनानिमित्ताने पाहणी केली.  

कल्याण तालुक्यातील खडवाली, जिभोणी, कातकरीपाडा, वाव्होली, सागवाडी, मानिवली कातकरीपाडा, नेतीवली कातकरीपाडा या ठिकाणी पाहाणी दौरा करून आदिवासी जमातीतील कातकरी कुंटुबांची नागरी सुविधांबाबत चौकशी केली. यावेळी देशाच्या स्वांतञ्याच्या ७४वर्षानंतर खरे स्वांतञ्याची किरणे गरीबांच्या झोपड्डी पर्यंत पोहचलेली नाही. अनेक आदिवासी कुंटुबांना घरकुल नाही, शुध्द पिण्याचे पाणी नाही, आधारकार्ड नाही, रेशनकार्ड नाही हे सर्व कातकरी कुंटुबांना मिळाले पाहीजे. या बाबत शासनाने ठरवुन दिलेल्या योजनांची अंमलबजावणी शासकीय अधिकाऱ्यांनी करण्याचे निर्देश संबंधित अधिकाऱ्यांना दिले.

यावेळी एकात्मिक आदिवासी प्रकल्प शहापुर प्रकल्प आधिकारी आर.एच.किल्लेदार, तहसिलदार दिपक आकडे, गटविकास आधिकारी श्वेता पालवे, महिला व बालविकास प्रकल्प आधिकारी चौधरी,  खडवली, नंडगाव, वाव्होली सजा तलाठी मंडळ आधिकारी सांळुखे, संबधित ग्रामपंचायतिचे ग्रामसेवक, केडीएमसी प्रभाग क्षेञ आधिकारी व कर्मचारी, श्रमजीवी  संघटनेचे पदाधिकारी जि.अध्यक्ष  आशोक सापटे, जि.सरचिटणीस राजेश चन्ने, दशरथ भालके, ता.अध्यक्ष विष्णु वाघे, उपाध्यक्ष ज्योती फसाले, विभागीय सचिव लक्ष्मण वाघे आदीजण दौ-या दरम्यान उपस्थीत होते.

-कुणाल म्हात्रे

वालधुनी नदी स्वच्छता समितीच्या शिष्टमंडळाने घेतली सिटी पार्क प्रमुख आणि शहर अभियंत्याची भेट

वालधुनी नदी स्वच्छता समिती च्या शिष्टमंडळाने सिटी पार्क व वालधुनी नदी संबंधित चर्चा करण्यासाठी सिटी पार्क प्रमुख जुनेजा व  शहर अभियंता सपना कोळी यांची भेट घेतली व सिटी पार्क व वालधुनी नदी स्वच्छ करण्या विषयी चर्चा केली. यावेळी संस्थेच्या अध्यक्षा पुष्पा रत्नपारखी, कार्याध्यक्ष सुनील उतेकर, सचिव आर्किटेक्ट गणेश नाईक, खजिनदार विनोद शिरवाडकर, उपाध्यक्ष पंकज डोईफोडे, भरत गायकवाड, सतिश मोरे आदी पदाधिकारी उपस्थित होते.

१९९५ साली सिटी पार्क बॉटनिकल गार्डन मंजूर झाले. हा विषय सर्व तत्कालीन लोकप्रतिनिधी यांच्या संमतीने महासभेत मंजूर झाला. २०१७ साली यु पी एस मदान यांनी ज्या ठिकाणी सिटी पार्क बनवण्याचा निर्णय घेतला गेला त्या ठिकाणी  पाणी भरत असल्याकारणाने कोणत्याही प्रकारचे बांधकाम करता येणार नाही असे मत व्यक्त करत आपला विरोध दर्शविला.

२०१८ साली पुन्हा पाणी भरून पूर परिस्थिती निर्माण झाली म्हणून केडीएमसीतर्फे  सीडब्ल्यूबीआरएस या पुणे येथील संस्थेशी सीआरझेड संबंधित चर्चा करण्यात आली. त्यांनी परिस्थिती समजून घेऊन पाईपलाईन पर्यंत रोड लेव्हलच्या दोन ते अडीच मीटर खाली अशी रिटेनिंग वॉल बांधण्यात यावी जेणेकरून नदीचे पाणी आत शिरणार नाही व सिटी पार्क पाण्यात जाणार नाही यासाठी हे सुचवले असल्याचे वालधुनी नदी स्वच्छता समितीच्या शिष्टमंडळाने भेट घेऊन चर्चा केली असता  संबंधित अधिकाऱ्यांनी  सांगितले.

    वालधुनी नदिचा उगम स्त्रोत मलंगगड येथून अंबरनाथ, उल्हासनगर ,कल्याण पूर्व ,कल्याण पश्चिम येथून खाडीत असा प्रवास ही वालधुनी नदी करते. नदी स्वच्छतेचा विषय फक्त मर्यादित नसून तिच्या उगम स्त्रोता पासून ते खाडी पर्यंत संपूर्ण लांबी विचारात घेतली जाते. हा पाटबंधारे खात्याचा विषय असून अंबरनाथ नगरपरिषद, उल्हासनगर व मनपा या तीन महानगरपालिकांचा विषय असल्यामुळे अडचण निर्माण होते असल्याचे  शहर अभियंता व जल अभियंता सपना कोळी यांनी सांगितले. तसेच प्रत्यक्ष ठिकाणी येऊन पाहणी करण्याचे आश्वासन दिले.

      हा विषय सिटी पार्क कसे बनवावे एवढाच मर्यादित आहे. परंतु अतिशय महत्त्वाचा विषय असा की या सिटी पार्कच्या भरावामुळे नदीचे पात्र अरुंद झाले व रिटेनिंग वॉल मुळे पाणी अडवले जाऊन हे पाणी लगतच्या परिसरात पसरून पूर परिस्थिती निर्माण होते. कडोमनपाने बांधकामास परवानगी दिलेल्या बिल्डिंगी व दुकाने यांच्यामध्ये या वालधुनी नदीचे पाणी शिरते, लोकांचे लाखोचे नुकसान होते. जर तीन महानगरपालिकेचा विषय असल्यामुळे किंवा पाटबंधारे खात्याचा विषय असल्यामुळे अडचणी येत असतील तर यात नागरीकांचा काय दोष? पाठ बंधारे खाते व तिन्ही महानगरपालिकांनी मिळून निर्णय घेतला पाहिजे वालधुनी नदी स्वच्छ करण्यासाठी निधी कुठून उपलब्ध करून घ्यावा हा सुद्धा त्यांचाच प्रश्न आहे. फक्त जे लोक पालिका प्रशासनाच्या काही निर्णयामुळे कायमचे पूरग्रस्त ठरले आहेत शासन दरबारी त्यांचा विचार केला गेला पाहिजे अशी मागणी वालधुनी नदी स्वच्छता समितीच्या अध्यक्षा पुष्पा रत्नपारखी यांनी यावेळी केली.

-कुणाल म्हात्रे

जातनिहाय सर्वेक्षण रद्द करण्याची रेशनिंग कृती समितीची मागणी

अन्न सुरक्षा कायदा २०१३ अन्वये अनुसूचित जाती जमाती प्रवर्गाची केंद्र शासनाच्या वतीने रेशन घेण्यासाठी फक्त एस.सी, एस.टी सर्वेक्षण करण्याचा आदेश काढला असून त्यानुसार शिधावाटप कार्यालयामार्फत व शिधावाटप दुकानांमध्ये जात सांगा व रेशन घ्या असा प्रकार आढळून आल्याने समाजामध्ये असंतोष निर्माण झाला आहे. याबाबत रेशनिंग कृती समितीचे संस्थापक अध्यक्ष राम बनसोडे यांनी शिधावाटप अधिकारी कल्याण यांना निवेदन देऊन जात निहाय सर्वेक्षण रद्द करण्याची मागणी केली आहे.

रेशन दुकानांमध्ये धान्य घेण्यासाठी गेलेल्यांना जात विचारली जात असून अनुसूचित जाती जमाती मधील लाभार्थ्यांना या शासकीय आदेशाने त्यांच्यावर होणारा अन्याय असल्याचे राम बनसोडे यांनी निवेदनात म्हटले आहे. बहुतांशी एस.सी, एस.टी व इतर मागासवर्गीय प्रवर्गातील समाज अन्नधान्याला मुकलेला असून तो आजही वंचित असताना तूंटपुंज्या समाजामधील लोकांचे सर्वेक्षण करून त्यांच्यावर अन्याय करणारा आहे.

 यामुळे समाजात जातनिहाय रोष व तेढ निर्माण होणार नाही व संविधानाने दिलेल्या अधिकाराची पायमल्ली होणार नाही याची शासनाने खबरदारी घ्यावी अशा स्वरूपाचे निवेदन कल्याणचे शिधावाटप अधिकारी यांना निवेदनात रेशनिंग कृती समितीचे संस्थापक अध्यक्ष राम बनसोडे यांनी केली आहे. यावेळी समितीचे जालंदर सूर्यवंशी, संजय काकडे, नीलिमा महाजन, सुलभा पांडे, गणेश ताटे आदी पदाधिकारी उपस्थित होते.

-कुणाल म्हात्रे

सर्वसामान्य प्रवाशांना लोकल ट्रेनने प्रवास करू द्या अन्यथा तीव्र आंदोलन छेडणार – मनसेचा रेल्वेला ईशारा

सर्वसामान्य प्रवाशांना लोकल ट्रेनने प्रवास करू देण्याची मागणी मनसेने केली असून कल्याण मनसे शहर संघटक रुपेश भोईर यांनी याबाबत मध्य रेल्वेच्या क्षेत्र अधिकारयांना, कल्याण स्टेशन अधीक्षक, लोहमार्ग पोलीस, रेल सुरक्षा बळ यांना  निवेदन दिले आहे. येत्या २ ते ३ दिवसांत सर्वसामान्यांना लोकलने प्रवास करू न दिल्यास मनसेतर्फे तीव्र आंदोलन करण्याचा इशारा देखील देण्यात आला आहे.

कोरोना काळात सावधगिरी म्हणून सरकार तर्फे सर्वात आधी उपनगरीय लोकल गाड्या बंद करण्यात आल्या आणि नंतर अतिआवश्यक सेवे करीता सुरु ही करण्यात आल्या. सरकारी आणि वैद्यकीय कर्मचारीच उपनगरीय गाड्यात प्रवास करू शकतात. आता सर्व काही पूर्व पदावर येत असतानाही, सामान्य प्रवाश्याना उपनगरीय गाड्यात प्रवेश नाही, म्हणजे सरकारी आणि वैद्यकीय कर्मचारीच काम करीत आहेत बाकीच्या लोकांनीं  घरी बसायचा का असा सवाल मनसेचे शहर संघटक रुपेश भोईर यांनी उपस्थित केला आहे.

सामान्य जनता लाचार झाली असून आता पाणी डोक्याच्या वर जात आहे. ज्या लोकांनी एक किंवा दोन्ही लस घेतलेल्या आहेत त्यांना तरी प्रवाशाची मुभा देण्यात यावी. जर येत्या दोन तीन दिवसात सामान्य प्रवाश्याचा विचार नाही केला गेला तर, मनसे तर्फे तीव्र आंदोलन करण्यात येईल आणि त्याची सर्वस्व जवाबदारी रेल्वेची असेल असा इशारा भोईर यांनी दिला आहे.

-कुणाल म्हात्रे

महानगरपालिकेच्या शाळेतील मुले बनवताहेत उपग्रह; आयुक्तांनी केला विद्यार्थ्यांचा गौरव

कल्याण डोंबिवली महानगरपालिकेच्या शाळेतील मुले उपग्रह बनवितात ही एक मोठी व अभिमानास्पद गोष्ट आहे, असे उद्गार महापालिका आयुक्त डॉ. विजय सूर्यवंशी यांनी त्यांचे गौरव करताना काढले आहे. डॉ.ए.पी.जे. अब्दुल कलाम इंटरनॅशनल फाऊंडेशन आणि स्पेस झोन इंडिया आयोजित ‘स्पेस रिचर्स पेलोड क्यूब्ज चॅलेंज 2021’ साठी महापालिकेच्या शाळातून 10 विदयार्थ्यांनी उपग्रह बनविण्याच्या मोहिमेत सहभाग घेतला. या मुलांना आज प्रशस्तीपत्र देवून गौरवितांना पालिका आयुक्तांनी हे उद्गार काढले.

मुलांनी अभ्यासाबरोबरच क्रिडा क्षेत्रातही नैपुण्य मिळवावे व पुढील आयुष्यात प्रगती करावी, अशा भरभरुन शुभेच्छा महापालिका आयुक्त डॉ. विजय सूर्यवंशी यांनी यावेळी उपस्थित विदयार्थ्यांना दिल्या. महापालिका शाळातून विदयार्थ्यांना यापुढेही कुठल्याही उपक्रमात सहभाग घ्यावयाचा झाल्यास निधीची कमतरता भासू देणार नाही, असे आश्वासन आयुक्त डॉ विजय सूर्यवंशी यावेळी दिले.

डॉ.ए.पी.जे. अब्दुल कलाम इंटरनॅशनल फाऊंडेशन, रामेश्वरम, तामिळनाडू आणि स्पेस झोन इंडिया आयोजित स्पेस रिचर्स पेलोड क्यूब्ज चॅलेंज 2021 साठी सदर फाऊंडेशनचे सचिव मिलींद चौधरी यांनी मार्टिन ग्रुप या संस्थेमार्फत महापालिकेच्या महात्मा फुले प्राथमिक विदयालय,शाळा क्र.68, बारावे, बंदे अली खाँ महापालिका शाळा क्र. 99/12, उर्दू बल्याणी, तिसाई प्राथमिक विदयालय, तिसगाव, मनपा शाळा क्र. 18,  मनपा शाळा क्र. 12, उंबर्डे, प्रबोधनकार ठाकरे मनपा शाळा क्र.19 नेतीवली या शाळातून 10 विदयार्थ्यांना उपग्रह बनविण्याचा मोहिमेत सहभागी करुन घेतले.

डिसेंबर 2020 ते जानेवारी 2021 या कालावधीत विदयार्थ्यांना उपग्रह बनविणेबाबत संस्थेमार्फत ऑनलाईन मार्गदर्शन कण्यात आले होते. आणि दि. 19 जानेवारी, 2021 रोजी जयवंतराव सावंत अभियांत्रिकी महाविदयालय, हडपसर, पुणे यांचेमार्फत उपग्रह बनविण्याची कार्यशाळादेखील आयोजित करण्यात आली होती. दि. 07 फेब्रुवारी 2021 रोजी रामेश्वरम तामिळनाडू येथून 100 उपग्रह हेलियम बलूनद्वारे एकाच वेळी अवकाशात सोडण्याचा विश्वविक्रम करण्यात आला.

हे उपग्रह एका केसमध्ये फिट केलेले असून त्यासमवेत पॅराशुट, जीपीएस ट्रकिंग सिस्टिम लाईव्ह कॅमेरा जोडलेला आहे, त्यामुळे प्रत्यक्ष ओझोन, कार्बन डायऑक्साईड, हवेची शुध्दता, हवेतील प्रदुषण, हवेचा दाब आणि माहिती या उपग्रहामार्फत पृथ्वीवरील केंद्राना पाठवता येईल. या पेलोड सोबत काही झाडांच्या बिया सुध्दा पाठविल्या आहेत. यामुळे कृषी विभागास अवकाशातील शेती करण्याच्या संशोधनास मदत मिळेल. अशाप्रकारे शालेय विदयार्थ्यांना उपग्रह बनविण्याचा उपक्रमामध्ये सहभागी करुन घेतल्यामुळे विदयार्थ्यांमध्ये स्पेस संबंधित संशोधनाची आवड निर्माण होवून भविष्यात त्यांना करियर बनवितांना नक्की उपयुक्त ठरेल. या गौरव सोहळयासमयी उपआयुक्त शिक्षण अनंत कदम, प्रशासन अधिकारी जे.जे. तडवी, शिक्षण विस्तार अधिकारी विजय सरकटे व संबंधित शाळांतील शिक्षक वर्ग विदयार्थ्यांसमवेत उपस्थित होता.

-संतोष दिवाडकर

प्रवाशाला लुटणाऱ्या रिक्षा चालकाला १६ तासांत अटक; KDMC च्या सीसीटीव्हीमुळे लागला शोध

प्रवाशाला लुबाडणाऱ्या रिक्षा चालकाला खडकपाडा पोलिसांनी अवघ्या १६ तासात बेड्या ठोकल्या आहेत. केडीएमसीच्या स्मार्ट सिटी प्रकल्पातील सीसीटीव्हीत ही रिक्षा कैद झाली आहे. रिक्षाच्या हूडचा  रंग युनिक असल्याने पोलिसांनी १६ तासाच्या आत प्रवाशाला लुटणाऱ्या रिक्षा चालक आणि त्याच्या साथीदारास बेडय़ा ठोकल्या आहेत. अजय कांबळे असे रिक्षा चालकाचं नाव असून रशीद शेख असं त्याच्या साथीदाराचं नाव आहे. हे दोघे कल्याण पूर्व भागातील पत्रिपुल श्रीकृष्ण नगर परिसरात राहणारे आहेत.

आकाश जैयस्वाल याने काल रात्री साडे आठ वाजण्याच्या सुमारास कल्याण पश्चिमेकडील निक्कीनगर  चौकातून कल्याण स्टेशनला जाण्यासाठी रिक्षा पकडली. या रिक्षात आधीच एक प्रवासी बसला होता. रिक्षा थोडय़ा अंतरावर गेली तेव्हा रिक्षा चालकाने रिक्षा रस्त्याच्या एका बाजूला निजर्न स्थळी घेऊन गेला. आकाश जवळली महागडा मोबाईल आणि रोकड घेऊन रिक्षा चालक आणि सह प्रवासी पसार झाले. मात्र कल्याण डोंबिवली महापालिकेच्या स्मार्ट सिटी प्रकल्पांतर्गत लावण्यात आलेल्या सीटीटीव्हीत ही रिक्षा कैद झाली होती. या सीसीटीव्हीच्या आधारे पोलिसांनी पोलिसांनी अवघ्या १६ तासात रिक्षाचालकासह त्याचा साथीदाराला गजाआड केलं असल्याची माहिती खडकपाडा पोलीस स्टेशनचे व.पो.नि. अशोक पवार यांनी दिली.

-कुणाल म्हात्रे

कल्याण पूर्व नांदीवलीत वाहन पासिंग मध्ये भ्रष्टाचार ? उप प्रादेशिक परिवहन अधिकाऱ्यांकडे होतेय चौकशीची मागणी

वाहन पासिंग मध्ये होत असलेल्या भ्रष्टाचाराची तृतीय पक्षा मार्फत चौकशी करण्याची मागणी राष्ट्र कल्याण पार्टीने केली असून याबाबत पार्टीचे अध्यक्ष शैलेश तिवारी यांच्या शिष्टमंडळाने कल्याणचे उप प्रादेशिक परिवहन अधिकारी तानाजी चव्हाण यांची भेट घेत निवेदन सादर केले आहे. यावेळी महासचिव राहुल काटकर, पवन दुबे, प्रविण के. सी., राज द्विवेदी आदी पदाधिकारी उपस्थित होते.

कल्याण पूर्वेतील नंदिवाली तलाव येथे कल्याण व ठाणे आरटीओ मधील गाड्यांचे पासिंग करण्यात येते. या ठिकाणी  आरटीओ अधिकारी, दलाल व काही स्थानिक मिळून वाहन पासिंग करताना वाहन चालक, मालक यांची लुट व फसवणूक करत आहेत. या ठिकाणी वाहन पासिंग करताना लाखों रुपयांचा भ्रष्टाचार होत आहे. शनिवार व रविवार या दिवशी काही विशेष दलालांच्या गाड्यांचे पासिंग करण्यात येत आहे. आरटीओ नियमानुसार सोमवार ते शुक्रवार या दिवशी वाहन पासिंग करण्यात यावे. तसेच प्रत्येक अधिकारी जास्तीत जास्त ४० वाहन पासिंग करु शकतात.

काही दलाल गाडी पासिंग करण्यासाठी ऑनलाइन मध्ये देण्यात आलेल्या तारखेला वाहन पासिंग न करता शनिवार व रविवार या दिवशी वाहन पासिंग करतात. वाहन पासिंग साठी आरटीओ नियमानुसार गाडी मध्ये काही त्रुटी असताना व आवश्यक कागद पत्र नसताना देखील अधिकारी व दलाल आर्थिक संगणमत करुन वाहन पासिंगकरत आहेत. तसेच वाहन पासिंग साठी बुक मध्ये लेखा जोखा देखील करत नाहीत. पासिंग साठी आलेल्या वाहन चालक मालक यांच्या कडुन अनधिकृत पणे पार्किंग साठी १०० रुपये घेतले जात आहेत. पार्किंगची पावती (बनावट पावती) असल्या शिवाय अधिकारी गाडी पासिंग करत नाहीत.

पासिंग साठी आलेल्या वाहन चालक मालक यांच्याकडुन अनधिकृत पणे गाडी सॅनिटायझर करण्यासाठी म्हणून जबरदस्ती १०० रुपये घेतले जात आहेत. सॅनिटायझर केल्याशिवाय अधिकारी गाडी पासिंग करत नाहीत. पासिंगसाठी आलेल्या वाहन चालक मालक यांना गाडीला विशेष व्यक्ती कडुन गाडीला रेडीयम लावण्यासाठी सक्ती अधिकारी यांच्या कडुन करण्यात येत आहे. हे सर्व भ्रष्टाचाराचे प्रकार असून यामुळे  नागरिकांची मोठी लुट होत असल्याचा आरोप राष्ट्र कल्याण पार्टीने केला आहे.

या सर्व मुद्दयांवर ७ दिवसात तृतीय पक्षा मार्फत चौकशी करुन चालु असलेला भ्रष्टाचार त्वरित थांबवून संबंधित अधिकाऱ्यांवर कायदेशीर कारवाई करण्यात यावी.अन्यथा राष्ट्र कल्याण पार्टी तर्फे आरटीओ कार्यालयामध्ये तिव्र आंदोलन करण्याचा इशारा उप प्रादेशिक परिवहन अधिकारी तानाजी चव्हाण यांना देण्यात आला आहे. त्याचबरोबर नांदिवली येथील भ्रष्टाचार करणाऱ्या बऱ्याच अधिकारी, दलाल व सामील असलेल्या काही स्थानिकांच्या व्हडीओ ऑडिओ क्लिप्स देखील असल्याचे बोलले जात आहे.

-कुणाल म्हात्रे

बाजारात पिशवी कापून चोऱ्यामाऱ्या करणाऱ्या दोन महिलांना केली अटक; टिटवाळा पोलिसांची कामगिरी

टिटवाळा बाजारपेठेत एक महिला खरेदीसाठी गेली असता या महिलेची पिशवी तिच्या नकळत कापून दोन तोळे सोने लंपास करण्यात आले होते. ही बाब लक्षात येताच या महिलेने पोलीस ठाणे गाठले. पोलिसांनी तक्रार दाखल होताच कसून तपास केला आणि २४ तासांच्या आतच चोरी करणाऱ्या दोन महिलांना अटक केली.

कल्याण तालुका पोलीस स्टेशन हद्दीत टिटवाळा बाजारपेठेत सोमवारी पार्वतीबाई बोराडे वय ५० वर्षे रा. टिटवाळा या महिला बाजारपेठेत खरेदी करण्याकरिता गेल्या असता त्यांच्या हातातील पिशवी कोणीतरी अज्ञात व्यक्तीने कापून पिशवीत ठेवलेले ५२ हजार रुपये किमतीचा सुमारे २ तोळे वजनाचा सोन्याचा ऐवज लंपास केला. ही बाब महिलेच्या लक्षात आल्यानंतर महिलेच्या फिर्यादीवरून टिटवाळा पोलीस स्टेशनला गुन्हा नोंद करण्यात आला होता.

       या गुन्ह्यातील आरोपींचा कल्याण तालुका पोलिस स्टेशन  पोलिस उप निरीक्षक सुर्वे, पोलिस उप निरीक्षक काजोल यादव, पोलिस कर्मचारी तुषार पाटील, दर्शन सावळे, नितीन विशे, योगेश वाघेरे यांनी शिताफीने शोध घेवून सोन्याचा ऐवज लुटणाऱ्या  गुन्ह्यातील दोन महिला आरोपी ज्योती अनिल धोत्रे वय २७  वर्ष राहणार आंबिवली आणि पिंकी मनोज साळुंके वय ३५ वर्ष राहणार आंबिवली यांना २४ तासांच्या आत ताब्यात घेतले. त्यांनी गुन्ह्याची कबुली दिली असता आरोपी महिला यांना अटक करून पुढील कार्यवाही करत आहेत.

बाजारात खरेदी करण्यासाठी महिलांची झुंबड उडालेली असते. अशावेळी गर्दीचा फायदा घेऊन हातातली पिशवी धारदार शस्त्राच्या मदतीने नकळतपणे कापून त्यातील किमती माल गायब केला जातो. यात कोणाची पिशवी कापायची यावर अगोदरच पाळत ठेवली जाते. त्याच्या पिशवीत काय असेल ? याचा अंदाज घेतला जातो. आणि त्यानंतर आखो आखो मे इशारा करीत गर्दीमध्ये पिशवी कापून चोरटे रफू चक्कर होऊन जातात. आशा प्रकारणात अनेक महिला पोलिसांत तक्रार देणे टाळत असल्याने अशा चोरट्यांचा चांगलाच जम बसतो. या घटना शहरी भागात मोठ्या प्रमाणात घडत आहेत. त्यामुळे गर्दीत खरेदी करताना आपल्या किंमती ऐवजाकडे विशेष लक्ष देण्याची आवाहन पोलिसांकडून केले जात आहे.

-कुणाल म्हात्रे

कोकणातील तळीये भूस्खलन आणि मनसे आमदाराच्या ११ लाखांच्या मदतीने भारावले गावकरी

कोकणातील महाड तालुक्यातील तळीये गावात दोन आठवड्यांपूर्वी डोंगरावरील जमीन सरकून वाहून गेली. या भूस्खलनात जवळपास ८४ लोकांचा मृत्यू झाला. मनसे आमदार राजू पाटील यांनी नुकतीच या ठिकाणी जाऊन भेट दिली तसेच मृतकांच्या कुटुंबियांना ११ लाखांची मदत देखील केली आहे.

मागील दोन आठवड्यापूर्वी मुंबई,पुणे,कोल्हापूर सह कोकणात देखील अतिवृष्टीमुळे हाहाकार पसरला होता. अनेक ठिकणी पूर परिस्थिती निर्माण झाली होती. कोकणात दुर्गम भागात दरडी कोसळल्या तसेच भूस्खलन देखील झाले. यातीलच महाड तालुक्यातील तळीये गावात देखील घडलं. संपूर्ण गावच्या गाव उध्वस्त झाले. कुटुंब मातीखाली गेली. कोसळलेला नुसता डोंगरच नव्हता तर दुःखाचा डोंगर होता. या घटनेनंतर शक्य तितके मृतदेह बाहेर काढण्यात आले. आता अनेक लोक रोज या ठिकाणी येऊन भेटी देत आहेत. सरकार कडून देखील मदत केली जाणार असल्याचे आश्वसित करण्यात आले आहे.

मनसेचे एकमेव आमदार राजू पाटील यांनी कोकण दौऱ्यावर असताना या गावात भेट दिली. त्याचप्रमाणे मृतांच्या कुटुंबियांच्या दुःखाचे सांत्वन केले. आणि पक्षाकडून ११ लाख रुपयांचा धनादेश त्यांनी दुखवटा म्हणून मृतकांच्या कुटुंबियांसाठी गावच्या सरपंचांकडे सुपूर्द केला. मनसेच्या आमदाराने केलेल्या इतक्या मोठ्या मदतीने तेथील लोक भारावले. दिलेल्या मदतीने गेलेला माणूस परत येत नसला तरी अश्या वेळी केलेल्या मदती बद्दल तेथील लोकांनी मनसे आमदारांचे आभार मानले. त्यामुळे सरकार कडून मदत येण्या पूर्वीच मनसेच्या आमदाराने केलेली मदत कुटुंबियांना थोडाफार पाठबळ देईल. तसे पाहता कितीही मोठी मदत दिली तरी दुःखाच्या डोंगरापुढे ती मातीच्या एका कना एवढीच आहे हे मात्र खरं.

लोकांचे संसार वाहून गेलेले आज स्वत: डोळ्यांनी पाहीले. ‘घर असावं घरासारखं’ म्हणायला ना तर घर शिल्लक आहे… न घरातली माणसं. नुसतं मृतात्म्यांना श्रध्दांजली वाहून दु:ख भरून येणार नाही, ह्याची आम्हाला पूर्ण जाणीव आहे. पण तरीही एक फुंकर म्हणून महाराष्ट्र नवनिर्माण सेनेतर्फे ११ लाख रूपये दुखवटा म्हणून तळीये गावचे सरपंच ह्यांच्याकडे सुपूर्द केला. कधीही न भरून येणारं अपरिमित नुकसान झालंय ह्या महापूरात. आज मनसेतर्फे केलेली ही मदत शेवटची नसणार एवढीच ग्वाही जाहीर देतो. पूरग्रस्तहो, तुमच्या दु:खात मी सहभागी होतो, आहे आणि कायम राहीन. आज माझ्यासोबत दौऱ्यावर आलेले सगळे मनसे पदाधिकारी आणि मनसैनिक ह्यांचा मला सार्थ अभिमान आहे.

– राजू पाटील (आमदार,मनसे)

-संतोष दिवाडकर