KDMC Bonus : दिवाळी सणाच्या पार्श्वभूमीवर कल्याण डोंबिवली महानगरपालिका कर्मचाऱ्यांना बोनस जाहीर करण्यात आल्याची माहिती सार्वजनिक बांधकाम मंत्री रवींद्र चव्हाण यांच्याकडून देण्यात आलेली आहे. यंदाच्या दिवाळीत १९,५०० रुपयांचा बोनस जाहीर झाला असून त्यासंदर्भात अनेक कर्मचारी तसेच संघटना मला भेटल्या होत्या, त्या सगळयांचे म्हणणे ऐकून घेत शासनाकडे मांडून त्या सगळ्यांना आता बोनस जाहीर झाला असल्याची माहिती मंत्री रवींद्र चव्हाण यांनी दिली आहे.
कर्मचाऱ्यांच्या बोनस करिता चव्हाण यांनी राज्य सरकारशी चर्चा केली होती. त्यामुळे बोनस दिल्याबद्दल मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार या सगळ्यांचे त्यांनी आभार मानले. यंदा कर्मचाऱ्यांना १९,५०० एवढा बोनस जाहीर करण्यात आला असून त्यासंदर्भात महापालिका आयुक्त डॉ. इंदुराणी जाखड यांना आदेश देण्यात आल्याचे चव्हाण म्हणाले.
कोविड काळातील पदभरती, २७ गावातील कर्मचारी अशा सगळ्यांनाच बोनस मिळणार असल्याचे त्यांनी जाहीर केले आहे. दिवाळीपूर्वीच सर्वांना बोनस वितरित होईल असेही ते म्हणाले. महानगरपालिका कर्मचारी वर्ग दरवर्षी भरघोस बोनस मिळावा यासाठी तळमळ व्यक्त करीत असतो. मात्र यंदा जाहीर झालेल्या बोनस नंतर महापालिका कर्मचाऱ्यांमध्ये आनंदाचे वातावरण आहे.
Diwali Bonus announced to KDMC employees
About Author
