गाडीच्या धडकेत श्वान ठार! आईच्या मृतदेहाजवळ पिल्लांच्या घिरट्या

कल्याण : संपूर्ण महाराष्ट्र शिवजयंतीच्या उत्साहात न्हाऊन निघालेला असतानाच, कल्याण पूर्वेतील गोपाळ कृष्ण नगर परिसरात माणुसकीला काळिमा फासणारी एक अत्यंत दुर्दैवी घटना समोर आली आहे. एका अज्ञात वाहनाने दिलेल्या धडकेत एका श्वानाचा जागीच मृत्यू झाला. हृदय पिळवटून टाकणारी बाब म्हणजे, आपली आई रक्ताच्या थारोळ्यात पडली आहे हे न समजणाऱ्या तिच्या लहान पिल्लांनी मृत आईचेच दूध प्राशन करण्याचा प्रयत्न केला. या दृश्याने परिसरात हळहळ व्यक्त होत असून नागरिकांमध्ये तीव्र संताप आहे.

​सदर श्वान ही मादी होती आणि तिला काही लहान पिल्ले होती. आपली आई आता जिवंत नाही याची पुसटशी कल्पनाही नसलेली ही पिल्ले रक्ताच्या थारोळ्यात पडलेल्या आईला उठवण्याचा प्रयत्न करत होती आणि भुकेपोटी तिचे दूध प्राशन करत होती. हे दृश्य पाहून येणाऱ्या-जाणाऱ्या नागरिकांचे डोळे पाणावले. सकाळी उजेड असतानाही हा अपघात झाला की मुद्दामहून श्वानाला चिरडले गेले, याबाबत परिसरात चर्चा सुरू आहे.
​
​घटनेची माहिती मिळताच परिसरातील श्वानप्रेमी ओमकार चासकर यांनी तातडीने घटनास्थळी धाव घेतली. त्यांनी तातडीने कल्याण-डोंबिवली महानगरपालिकेशी संपर्क साधून मृत श्वानाचा देह त्यांच्या स्वाधीन केला. तसेच, उघड्यावर पडलेल्या त्या पोरक्या पिल्लांच्या सुरक्षिततेसाठी त्यांनी एका पशुसंवर्धन संस्थेशी संपर्क साधला. या संस्थेमार्फत आता या पिल्लांचे संगोपन केले जाणार आहे.

कारवाईची मागणी :

सदर परिसरातील सीसीटीव्ही कॅमेरे तपासण्याची मागणी नागरिकांकडून होत असून, बेजबाबदार वाहनचालकांवर कठोर कारवाई करण्याची मागणी आता जोर धरत आहे. एकिकडे आपण उत्सवाचा आनंद साजरा करत असताना दुसरीकडे अशा अमानुष घटना घडणे हे निंदनीय आहे. त्या मुक्या जिवाचा जीव घेणाऱ्या अज्ञात वाहनचालकाचा शोध घेऊन त्याच्यावर कायदेशीर कारवाई झालीच पाहिजे. अशी मागणी नागरिक करीत आहेत.

Dog killed in car crash in Kalyan