आमदार Ganpat Gaikwad यांचे द्वितीय पुत्र Son राजकारणात? राजकीय वर्तुळात चर्चा

Ganpat Gaikwad Son : अंबरनाथ पोलीस स्थानक गोळीबार प्रकरणी कल्याण पूर्वचे आमदार गणपत गायकवाड हे सध्या तळोजा कारागृहात आहेत. तर त्यांचे ज्येष्ठ पुत्र वैभव गायकवाड हे या घटनेनंतर अज्ञातवासात आहेत. त्यांच्या पश्चात गायकवाड यांच्या पत्नी सुलभा गायकवाड या सक्रियपणे राजकारणात उतरल्या असून मागील काही काळापासून ते संपूर्ण मतदारसंघात वावरताना दिसत आहेत. त्यातच आता आमदार गणपत गायकवाड यांचे द्वितीय चिरंजीव प्रणव गायकवाड हे देखील नुकतेच एका विकासकामाच्या लोकार्पण प्रसंगी प्रथमच उपस्थित असल्याचे दिसल्यानंतर ते देखील राजकीय क्षेत्रात उतरले आहेत का? अशा चर्चा राजकीय वर्तुळात रंगू लागल्या आहेत.

गणपत गायकवाड तरुण वयात असल्यापासूनच सामाजिक कार्यातून पुढे आले होते. त्यानंतर सलग दोन वेळा अपक्ष आमदार झाल्यानंतर त्यांनी भारतीय जनता पक्षातून तिसऱ्यांदा विजयी निवडणूक लढवली होती. त्यांचे ज्येष्ठ सुपुत्र वैभव गायकवाड यांनी देखील मागील वर्षी राजकारणात अधिकृतरित्या एन्ट्री केली होती. या संपूर्ण वर्षभरात त्यांच्या अनुपस्थितीत सुलभा गायकवाड यांनी मतदारसंघाची मदार आपल्या खांद्यावर घेऊन कामकाज सुरू ठेवले. त्यानंतर आता त्यांचे कनिष्ठ चिरंजीव प्रणव गायकवाड हे देखील एका राजकीय समारंभात दिसून आल्याने सर्वांच्याच भुवया उंचावल्या होत्या. शुक्रवारी आमदार निधीतून मंजूर करण्यात आलेल्या एका विकासकामाच्या लोकार्पण प्रसंगी ते उपस्थित राहिले होते. त्यांच्याच हस्ते प्रभाग क्रमांक ११८ परिसरात विद्युत एल.ई.डी. पथदिव्यांचे लोकार्पण करण्यात आले असून उपस्थितांनी याबाबत त्यांचे स्वागत केले.

प्रणव गायकवाड हे राजकीय गराळ्यापासून नेहमीच स्वतःला दूर ठेवत आले आहेत. साधी राहणी आणि सर्वसामान्य जीवनपद्धती अशी त्यांची ओळख असून याआधी ते धार्मिक,कौटुंबिक कार्य सोडता कधीही राजकीय अथवा सामाजिक प्रकाश झोतात आलेले नाहीत. मात्र आयोजित लोकार्पण सोहळ्याला काही कारणाने सुलभा गायकवाड यांना उपस्थित राहता न आल्याने प्रणव गायकवाड हे स्वतः उपस्थित राहिले असल्याची माहिती आहे. त्यामुळे प्रणव गायकवाड हे अद्याप राजकारणात आलेले नसून त्यांनी फक्त सामाजिक कार्य म्हणून सदर कार्यक्रमात उपस्थिती दर्शविली असल्याचे सांगण्यात येत आहे.

MLA Ganpat Gaikwad second son in politics?

MSRTC NEWS : एसटी कर्मचाऱ्यांच्या मुळ वेतनामध्ये झाली वाढ; मुख्यमंत्र्यांची घोषणा

MSRTC News : राज्य परिवहन महामंडळातील कर्मचाऱ्यांना एप्रिल २०२० पासून मुळ वेतनामध्ये ६५०० रुपयांची वाढ करण्याचा निर्णय मुख्यमंत्री एकनाथ शिंदे यांनी घेतला आहे. या निर्णयाचे एसटी कर्मचारी कृती संघटनेने स्वागत करीत मुख्यमंत्र्यांचे आभार मानले. ऐन गणपती उत्सवाच्या काळात एसटी संपामुळे सामान्यांना झालेल्या त्रासाबद्दल मुख्यमंत्र्यांनी संघटनांकडे तीव्र नाराजी व्यक्त केली.

एसटी कर्मचाऱ्यांनी पुकारलेल्या संपाच्या पार्श्वभूमीवर सह्याद्री अतिथीगृह येथे मुख्यमंत्री शिंदे यांच्या अध्यक्षतेखाली कर्मचारी संघटनांची बैठक झाली. यावेळी उपमुख्यमंत्री देवेंद्र फडणवीस, उद्योगमंत्री उदय सामंत, आमदार सर्वश्री सदाभाऊ खोत, गोपीचंद पडळकर, मुख्यमंत्र्यांचे अपर मुख्य सचिव डॉ. आय. एस. चहल, अपर मुख्य सचिव विकास खारगे, परिवहन विभागाचे अपर मुख्य सचिव संजय सेठी, वित्त विभागाचे अपर मुख्य सचिव ओ. पी. गुप्ता, एसटी महामंडळाचे व्यवस्थापकीय संचालक माधव कुसेकर यांच्यासह विविध कर्मचारी संघटनांचे प्रतिनीधी उपस्थित होते.

राज्य शासन एसटी कर्मचाऱ्यांच्या मागण्यांबाबत सकारात्मक असताना उत्सवाच्या काळात संप करून सामान्यांना वेठीस धरणे योग्य नाही असे सांगत बैठकीच्या सुरूवातीलाच मुख्यमंत्री एकनाथ शिंदे यांनी संपाबाबत तीव्र नाराजी व्यक्त केली. संघटनांनी यावेळी केलेल्या वेतनवाढीच्या मागणीबाबत मधला मार्ग काढून एसटी कर्मचाऱ्यांना दिलासा देण्याची भूमिका असल्याचे सांगत एप्रिल २०२० पासून कर्मचाऱ्यांच्या मुळ वेतनात ६५०० रुपयांनी वाढ करण्याचा निर्णय मुख्यमंत्र्यांनी जाहीर केला.

राज्यातील आगारांमध्ये चालक-वाहकांसाठी असणारी विश्रामगृहांची दुरवस्था दूर करण्यासाठी आराखडा तयार करण्याचे निर्देश मुख्यमंत्र्यांनी यावेळी दिले. चालक-वाहकांना चांगल्या सोयीसुविधा मिळायला पाहिजेत, असे सांगतानाच एसटीचा महसुल वाढीसाठी कर्मचाऱ्यांनी प्रयत्न करण्याचे आवाहनही मुख्यमंत्र्यांनी यावेळी केले. एसटी कर्मचाऱ्यांना वैद्यकीय खर्च प्रतिपूर्ती बाबत विषयी चर्चा करताना राज्य शासनाने सर्वांसाठी महात्मा जोतिबा फुले जनआरोग्य योजना केली असून त्याच्याशी संलग्न योजना एसटी महामंडळाने करावी, त्याचा लाभ कर्मचाऱ्यांना होईल, अशी सूचना उपमुख्यमंत्री देवेंद्र फडणवीस यांनी केली. यावेळी सेवानिवृत्त कर्मचाऱ्यांना वर्षभराचा मोफत पास, निलंबित कर्मचाऱ्यांना सेवेत घेणे आदी विषयांबाबत चर्चा करण्यात आली.

MSRTC NEWS : Increase in basic pay of ST employees; Chief Minister’s announcement

KDMC News : मनसे शाखेसमोरील शेडवर कारवाई करणाऱ्या सहाय्यक आयुक्तांची बदली

KDMC News : कल्याण पूर्वेतील चिकणीपाडा येथील मनसे शाखेबाहेर असलेल्या पत्र्यांच्या शेडवर काही दिवसांपूर्वी महानगरपालिकेने तोडक कारवाई केली होती. 4 जे प्रभागाच्या तत्कालीन सहाय्यक आयुक्त सविता हिले यांनी प्राप्त झालेल्या तक्रारीनुसार ही कारवाई केली होती. त्यांच्या या कारवाई नंतर मनसे पदाधिकाऱ्यांनी बॅनर लावून तक्रारदारांचा निषेध व्यक्त केला होता. मात्र कारवाई करणाऱ्या अधिकाऱ्यांची आता काही दिवसांपूर्वी बदली झाल्याचे समोर आले आहे. परंतु ही बदली कारवाईमुळे झाली नसून महापालिकेच्या कार्यप्रणालीनुसार करण्यात आली आहे.

महापालिका आयुक्तांच्या निर्देशानंतरही अनेक ठिकाणी असंख्य अनधिकृत ढाबे राजरोसपणे सुरू आहेत. त्यांच्यावर कारवाई न करता मनसे शाखेसमोरील पत्र्याचे शेड तोडणे महापालिकेला जास्त महत्त्वाचे वाटते का? असा सवाल मनसे पदाधिकार्यांनी उपस्थित केला होता. तसेच सत्ताधारी पक्षातील काही राजकीय मंडळींनी आकसापोटी महापालिकेकडे तक्रार केली असल्याचे सांगत मनसेने शाखेसमोरील रस्त्यालगत एक भलेमोठे होर्डिंग्ज लावले होते. ज्यात ‘कोणीही सत्तेचा ताम्रपट घेऊन आलेला नाही’ असा राज ठाकरेंच्या विधानाचा मजकूर लिहलेला होता. तक्रादारांच्या डोळ्यावरची सत्तेची झापड उतरविण्यासाठी आम्ही बॅनर लावला असल्याचे यावेळी सांगण्यात आले होते.

कल्याण डोंबिवली महानगरपालिका आयुक्त डॉ.इंदूराणी जाखड यांनी 4 जे प्रभाग क्षेत्राच्या तत्कालीन सहाय्यक आयुक्त सविता हिले यांची 5 ड प्रभाग क्षेत्रात बदली केली आहे. तर 4 जे प्रभाग क्षेत्राच्या सहाय्यक आयुक्त पदी सचिन तामखेडे यांची नियुक्ती करण्यात आली आहे. या बदली प्रक्रियेत 5 ड प्रभाग क्षेत्राचे तत्कालीन सहाय्यक आयुक्त धनंजय थोरात यांच्यावर सामान्य प्रशासन सहाय्यक आयुक्त पदाचा कार्यभार सोपविण्यात आला आहे. मनसे शेडबाहेरील पत्र्यांच्या शेडवर केलेली कारवाई ही प्राप्त तक्रारीनुसार करण्यात आली होती. झालेल्या बदल्या या प्रशासकीय कामकाजाच्या सोयीसाठी करण्यात आल्या असल्याचे बदली आदेशात नमूद करण्यात आलेले आहे.

KDMC News : Transfer of Assistant Commissioner who took action on shed in front of MNS branch

मालवणमधील शिवरायांच्या मूर्ती दुर्घटने प्रकरणी कल्याणचे मूर्तिकार जयदीप आपटे यांच्यावर गुन्हा दाखल

जयदीप आपटे : मालवणमधील राजकोट किल्ल्यावरील छत्रपती शिवाजी महाराजांचा पुतळा कोसळल्यानंतर राज्यभरात संतापाची लाट उसळली आहे. या दुर्घटनेनंतर शिवप्रेमींमध्ये संतापाची लाट उसळली असून विरोधकांनी देखील सरकारला धारेवर धरले आहे. या घटनेनंतर कल्याण येथील या मूर्तीचे निर्माते जयदीप आपटे यांच्यावर गुन्हा दाखल केला आहे.

आठ महिन्यांपूर्वी पंतप्रधान नरेंद्र मोदी यांच्या हस्ते या पुतळ्याचे अनावरण करण्यात आले होते. याप्रसंगी त्यांच्या समवेत केंद्रीय मंत्री नारायण राणे, राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार, सार्वजनिक बांधकाम मंत्री रवींद्र चव्हाण देखील उपस्थित होते. हा पुतळा भारतीय नौदलाने उभरला असून तो बनविण्याची जबाबदारी जयदीप आपटे यांच्याकडे देण्यात आली होती.

जयदीप आपटे हा कल्याणमधील अंदाजे २५ वर्षीय तरुण असून त्याने राजकोट किल्ल्यावर २८ फूट उंच ब्राँझचा पुतळा तयार केला होता. या पुतळ्याच्या बांधकामाला सुमारे 3 वर्षे लागली, जयदीपने एका मुलाखतीत सांगितले की, पुतळ्याचे निर्माण जून 2023 मध्ये सुरू झाले आणि डिसेंबर 2023 पर्यंत म्हणजे केवळ सात महिन्यांत पूर्ण झाले होते. पोलिसांनी आता जयदीप आपटे आणि स्ट्रक्चरल कन्सल्टंट चेतन पाटील यांच्यावर गुन्हा दाखल केला आहे. आपण शिवाजी महाराजांच्या पुतळ्याचे संपूर्ण स्ट्रक्चरल ऑडिट केले नसून केवळ पुतळ्यासाठी बांधलेल्या व्यासपीठाची रचना केली होती, असे सांगत चेतन पाटील यांनी आपल्यावरील आरोप फेटाळून लावले आहेत.

समाज माध्यमांवर उपलब्ध असलेल्या माहितीनुसार जयदीप आपटे यांनी जे जे स्कुल ऑफ आर्ट्स व एल एस रहेजा आर्ट्स स्कुलमध्ये शिक्षण घेतले आहे. जयदीप आपटे हे खरेतर एक उत्तम मूर्तिकार असून त्यांनी अनेक मुर्त्या घडविल्या आहेत. त्यांनी बनवलेल्या मुर्त्या ह्या जिवंत असल्याचा भास होतो. यामुळेच त्यांना हे काम दिले असावे असा कयास बांधला जात आहे. मात्र एक भव्य दिव्य मूर्तीची उभारणी करण्यात ते अयशस्वी ठरले असून त्यांच्यावर टिकांचा वर्षाव होत असून ते कायद्याच्या कचाट्यातही सापडले आहेत. या घटनेनंतर जयदीप यांच्या आजवरच्या कामावर पाणी फेरलं गेलंय. मात्र संपुर्ण विश्वास नसेल तर इतके मोठं काम स्वीकारायला नको होते असेही काही जाणकार म्हणत आहेत.

A case has been registered against the sculptor of Kalyan in the case of Shivaraya idol accident in Malvan

जयदीप आपटे यांनी बनविलेल्या काही मुर्त्या :-

Kalyan MNS : मनसे शाखेसमोरील शेडवर कारवाई; पदाधिकाऱ्यांनी बॅनर लावून व्यक्त केला संताप

Kalyan MNS : कल्याण पूर्वेतील चिकणीपाडा येथील मनसे शाखेबाहेर असलेल्या पत्र्यांच्या शेडवर काही दिवसांपूर्वी महापाकिलेने तोडक कारवाई केली होती. या कारवाई विरोधात मनसे पदाधिकाऱ्यांनी शाखेच्या समोरच एक बॅनर लावला असून ही कारवाई आकसापोटी केली असल्याचे पदाधिकाऱ्यांचे म्हणणे आहे. कोणीही सत्तेचा ताम्रपट घेऊन आलेला नाही असे राज ठाकरेंनी केलेले एक विधान त्यांनी या बॅनरवर लिहून ईशारा दिला आहे.

कल्याण डोंबिवली महानगरपालिकेकडे सदर पत्र्याचे शेड अनधिकृत असून ते तोडण्याची तक्रार प्राप्त झाली होती. त्यानुसार महापालिका कारवाई करीत असल्याची माहिती 4 जे प्रभाग क्षेत्राच्या सहाय्याक आयुक्त सविता हिले यांनी दिली आहे. मात्र दुसरीकडे पालिका आयुक्तांच्या निर्देशानंतरही अनेक ठिकाणी असंख्य अनधिकृत ढाबे बिनदिक्कतपणे सुरू आहेत. या ढाब्यांवर बेकायदा दारूच्या पार्ट्या सुरू आहेत. काही ढाबे विना परवाना ग्राहकांना मद्यविक्रीही करीत आहेत. असले काळे धंदे सुरू असताना प्रशासनाला मनसे शाखे समोरील शेड तोडणे महत्त्वाचे वाटते का असा सवाल मनसे पदाधिकाऱ्यांनी उपस्थित केला आहे.

सत्ताधारी पक्षाच्या पदाधिकाऱ्यांनी शेड संदर्भात तक्रार केली असून सत्तेचा वापर करून अशा तक्रारी खोडसाळपणाने करून आमचे समाजकार्य बघवले जात नाही असेही मनसे पदाधिकाऱ्यांचे म्हणणे आहे. याच खोडसाळ तक्रारदारांना आम्ही एकाच ओळीत उत्तर दिले असून हा बॅनर त्यांच्या डोळ्यावरची सत्तेची मस्ती असलेली झापड काढण्यासाठी लावला असल्याचे सांगण्यात आले. आम्ही सर्व गोष्टींचा हिशोब ठेवतो आणि वेळेवर तो चुकताही करतो असेही यावेळी मनसे पदाधिकारी म्हणाले.

Kalyan MNS : Action on shed in front of MNS branch

Dombivli Dahihandi : यंदा दीपेश म्हात्रे रिक्षाचालकांना देणार दहीहंडी फोडण्याचा मान

Dombivli Dahihandi : दीपेश म्हात्रे फाउंडेशनच्या वतीने ‘स्वराज्य दहीकाला उत्सव’ या वर्षी तिसऱ्यांदा सम्राट चौक, डोंबिवली पश्चिम येथे मोठ्या उत्साहात साजरा करण्यात येणार आहे. या वर्षीचा दहीहंडी फोडण्याचा मान रिक्षा चालकांना देण्यात येणार आहे. डोंबिवली शहरातील नागरिकांची सेवा, कोरोना काळातील उल्लेखनीय कार्य तसेच अनेकदा अॅम्बुलन्स पोहोचण्यापूर्वीच नागरिकांना हॉस्पिटलमध्ये पोहोचवण्याचे काम रिक्षा चालक करतात. या अद्वितीय कार्याबद्दल त्यांच्या सन्मानार्थ त्यांना या वर्षीचा दहीहंडी फोडण्याचा मान देण्यात येत असल्याचे दीपेश म्हात्रे यांनी पत्रकार परिषदेत सांगितले.

दहीहंडी महोत्सवाच्या संध्याकाळी ‘गुलाबी साडी’ फेम संजू राठोड यांचा लाईव्ह परफॉर्मन्स होणार आहे. तसेच प्रसिद्ध युट्युबर विनायक माळी देखील या कार्यक्रमात सहभागी होणार आहे. या वर्षीच्या दहीहंडी स्पर्धेचे प्रथम पारितोषिक एक लाख रुपये असून ते सर्वांसाठी खुले असणार आहे. द्वितीय पारितोषिक देखील एक लाख रुपये असून ते मात्र डोंबिवलीतील मंडळांसाठीच आरक्षित असेल. 26 ऑगस्टच्या रात्री 11 वाजता कृष्ण जन्मोत्सव पारंपरिक भजनांच्या माध्यमातून आणि पारंपरिक पद्धतीने साजरा केला जाणार आहे. तरी, या उत्सवात सहभागी होऊन दहीहंडीचा आनंद सर्व नागरिकांनी घ्यावा, असे दीपेश म्हात्रे फाउंडेशनकडून सर्व नागरिकांना आवाहन करण्यात आले आहे.

सण उत्सवात विविध पक्ष रस्त्यावर कमानी उभ्या करतात, मोठमोठे होर्डिंग्ज आणि बॅनर लावतात. सध्या रस्त्यांची सर्वत्र दुरावस्था झाल्याने वाहतूक संथ गतीने सुरू आहे. त्यामुळे कमानी उभारून वाहतुकीला अडथळा निर्माण करू नका असा संदेश दीपेश म्हात्रे यांनी सर्वपक्षीय नेत्यांना तसेच कार्यकर्त्यांना आयोजित पत्रकार परिषदेच्या माध्यमातून दिला आहे.

Dombivli Dahihandi : This year Dipesh Mhatre will give the honor of breaking Dahihandi to the rickshaw drivers

MSRTC : रक्षाबंधन निमित्त प्रवासी बंधूंकडून एसटीला अब्जो ओवाळणी

MSRTC :- यंदा रक्षाबंधन आणि त्याला जोडून आलेल्या सुट्ट्यांमुळे १७ ते २० ऑगस्ट या चार दिवसांमध्ये प्रवाशांनी तुडुंब भरलेल्या एसटीमधून महामंडळाला १२१ कोटी रुपयांचे उत्पन्न मिळाले आहे. विशेष म्हणजे २० ऑगस्टला एकाच दिवशी तब्बल ३५ कोटी रुपयांचे उत्पन्न महामंडळाला प्रवासी वाहतुकीतून मिळाले आहे. यंदाच्या आर्थिक वर्षातील हे विक्रमी उत्पन्न आहे.

दरवर्षी एसटीला रक्षाबंधन आणि भाऊबीज या दोन दिवसातं विक्रमी उत्पन्न मिळत असते. कारण, या दिवशी भाऊ बहिणीकडे किंवा बहिण भावाकडे असे प्रवासी दळणवळण मोठ्या प्रमाणामध्ये होते. परिणामी गेली कित्येक वर्ष रक्षाबंधनच्या दिवशी एसटीला त्या वर्षातील विक्रमी उत्पन्न मिळत आले आहे. यंदा रक्षाबंधन आणि त्याच्या दुसऱ्या दिवशी एसटीला प्रवाशांची प्रचंड गर्दी झाली होती. रक्षाबंधन दिवशी म्हणजे सोमवारी ३० कोटी व दुसऱ्या दिवशी म्हणजे मंगळवारी तब्बल ३५ कोटी रुपये उत्पन्न एसटीला मिळाले. या दोन दिवसात १ कोटी ६ लाख प्रवाशांनी एसटीमधून सुरक्षित प्रवास केला आहे. त्यामध्ये महिला प्रवाशांची संख्या तब्बल ५० लाख आहे.

रक्षाबंधन सणानिमित्त एवढ्या मोठ्या प्रमाणात प्रवाशांनी दिलेल्या प्रतिसादाबद्दल एसटी महामंडळाने प्रवाशांचे आभार मानले आहेत. तसेच आपल्या घरी सण असून देखील कर्तव्याला प्राधान्य देत अत्यंत मेहनतीने काम करुन विक्रमी उत्पन्न आणणाऱ्या एसटी कर्मचाऱ्यांचे देखील हार्दिक अभिनंदन केले आहे.

MSRTC : Ovalani to ST from commuter brothers on the occasion of Rakshabandhan

Vitthalwadi ST Depot : प्रवाशांना सुरक्षित सेवा देणाऱ्या कर्मचाऱ्यांना विशेष बॅज देऊन स्वातंत्र्य दिन साजरा

Vitthalwadi ST Depot : महाराष्ट्र राज्य महामार्ग परिवहन महामंडळाच्या विठ्ठलवाडी एसटी आगारात भारताचा ७८ वा स्वातंत्र्य दिन अनोख्या पद्धतीने साजरा करण्यात आला. आगारात नव्याने नियुक्त झालेल्या आगार व्यवस्थापक गीता कोंडार यांच्या हस्ते ध्वजारोहण करून आगारातील पाच वर्षे सुरक्षित सेवा देणाऱ्या कर्मचाऱ्यांना सन्मान बॅज देऊन त्यांचा गौरव करण्यात आला.

कल्याण रेल्वे स्थानकात स्मार्ट सिटी अंतर्गत काम सुरू असल्याने कल्याणचा एसटी डेपो तात्पुरत्या स्वरूपात विठ्ठलवाडी एसटी आगारात हलविण्यात आला आहे. त्यामुळे सकाळपासूनच विठ्ठलवाडी एसटी आगारातून असंख्य वाहने ये जा करतात तसेच प्रवासी संख्या देखील वाढली आहे. त्यामुळे विठ्ठलवाडी एसटी आगाराचे देखील व्यवस्थापन वाढले असून आता व्यवस्थापक पदी गीता कोंडार यांची नियुक्ती करण्यात आली आहे. त्यांच्याच हस्ते आज ध्वजारोहण करण्यात आले. त्यांच्या समवेत सहाय्यक कार्यशाळा अधिक्षक महेश भोये, वाहतूक निरीक्षक राजाराम जाधव व असंख्य एसटी कर्मचारी उपस्थित होते.

एसटीचा प्रवास सुखाचा प्रवास असे म्हटले जाते. मात्र हाच प्रवास सुखाचा करण्यासाठी चालक व वाचकांचे सर्वात मोठे योगदान असते. स्वातंत्र्य दिनाचे औचित्य साधून विठ्ठलवाडी एसटी आगारातील पंकज भावसार व चालक नितीन चौधरी यांनी एसटी महामंडळात पाच वर्षे सुरक्षित सेवा दिल्याबद्दल त्यांचा विशेष बॅज देऊन सन्मान करण्यात आला. एसटी महामंडळात नोकरीला लागल्या पासून आम्ही आमची नोकरी इमानी इतभरे करीत आलो आहोत. एसटी ही प्रवाशांच्या सेवेसाठी आहे याची पूर्ण जाण असल्याने आम्ही सर्व कर्मचारी प्राण ओतून काम करीत असतो अशा भावना यावेळी विठ्ठलवाडी एसटी आगाराचे कर्मचारी योगेंद्र कदम यांनी व्यक्त केल्या.

Vitthalwadi ST Depot : Celebrating Independence Day by awarding special badges to employees who provide safe services to passengers

Kalyan Student Suicide : पात्रता नसलेले शिक्षक असलेल्या खाजगी शाळा संस्थांवर कारवाईसाठी मुख्यमंत्र्यांना पत्र

Kalyan East : कल्याण पूर्वेतील चिकणीपाडा परिसरात एका शाळकरी विद्यार्थ्याने शिक्षिकेच्या नावे सुसाईड नोट लिहून आत्महत्या केली होती. ही बाब लक्षात घेता माजी नगरसेवक उदय रसाळ यांनी थेट मुख्यमंत्री एकनाथ शिंदे यांना पत्राद्वारे कारवाई करण्याची मागणी केली आहे. प्राथमिक प्रशिक्षित मान्यता प्राप्त पात्रता नसलेले शिक्षक घेऊन खाजगी शाळेच्या माध्यमातून भरमसाठ फी घेऊन व्यापार करणाऱ्या संस्थामुळे विद्यार्थी व पालकांचे नुकसान होत आहे. त्यामुळे अशा संस्थांवर कारवाई करावी असे पत्रात नमूद करण्यात आले आहे.

प्रशिक्षित पात्रता म्हणजे डी.एड, बी.एड पदवीधारक. या व्यतिरिक्त इतर कुणालाही विद्यार्थ्यांना शिकवण्याची पात्रता नसते. या प्रशिक्षणात बाल मानसशास्त्र हा महत्त्वाचा विषय असतो. परंतु खाजगी शाळांमध्ये अधिक नफा मिळवण्यासाठी भरमसाठ फी घेऊन पात्रता नसलेले शिक्षक म्हणून कमी पगारावर रुजू केले जातात. अशा शिक्षकांना बाल मानसशास्त्र माहीत नसल्याने विद्यार्थ्यांशी कसे वागावे हे या शिक्षकांना ठाऊक नसते. त्यामुळे समाजात अघटित प्रकार समोर येतात असे उदय रसाळ यांनी पत्राद्वारे म्हटले आहे.

कल्याण डोंबिवलीत अशा अनेक शाळा आहेत ज्यात अशाच प्रकारची शिक्षक भरती आहे. एखादा विद्यार्थी शिक्षकांच्या भीतीने किंवा शिक्षकाच्या कार्य पद्धतीने सरळ आत्महत्या करतो हे प्रचंड भयानक आहे. जे मुलं आत्महत्या करत नाहीत त्या मुलांचा बौद्धिक विकास अशा शिक्षकांमुळे खुंटतो किंवा मुलं पुढील शिक्षणात मागे पडतात. काल दि १२ ऑगस्ट २४ रोजी, कल्याण पूर्व येथील एका शाळेतील बारा वर्षाच्या मुलाने असेच शिक्षकांच्या त्रासामुळे जीव दिला. असे अप्रशिक्षित शिक्षक ज्या ज्या शाळेमध्ये भरणा केले आहेत अशा संस्थांची त्वरित चौकशी करून कारवाई करावी. आणि अशा संस्था तसेच शाळांबाबत प्रशिक्षित शिक्षक भरती बाबत कठोर नियमावली करण्यात यावी. जी सर्व प्रकारच्या शाळांना लागू व्हावी अशी मागणी मा. मुख्य मंत्री आणि शिक्षण मंत्री यांच्याकडे केली आहे.

– उदय रसाळ (माजी नगरसेवक)

Kalyan Student Suicide : Letter to Chief Minister to take action against private school institutions with unqualified teachers

शिंदेशाही वर पुन्हा काळ चक्र; Dinkar Shinde यांचं निधन

Dinkar Shinde : महाराष्ट्राचे प्रख्यात गायक प्रल्हाद शिंदे यांचे तृतीय पुत्र गायक दिनकर शिंदे यांचे आज रात्री २ च्या दरम्यान अल्पशा आजाराने निधन झाले. त्यांच्या अचानकपणे जाण्याने शिंदे कुटुंबियांवर दुःखाचा डोंगर कोसळला आहे. कल्याण पूर्वेतील आनंदवाडी येथील राहत्या घरापासून त्यांची अंतिम यात्रा निघणार असून शहरासह राज्यभरातील त्यांच्या चाहत्या वर्गात शोककळा पसरली आहे.

महाराष्ट्राचे लोकसंगीतकार गायक प्रल्हाद शिंदे यांची गाणी आजही अजरामर आहेत. त्यांच्या आवाजातील जादू ही केवळ त्यांच्या पुरतेच मर्यादित न राहता त्यांच्या आवाजाचा वारसा त्यांनी आपल्या आपत्यांनाही दिला. त्यातीलच एक अपत्य म्हणजे दिनकर प्रल्हाद शिंदे. वयाच्या ५८ व्या वर्षी त्यांनी मुंबईच्या जे जे रुग्णालयात अखेरचा श्वास घेतला. त्यांची अनेक गीते, भक्तिगीते, भीमगिते, कव्वाली लोकांच्या पसंतीस उतरली आहेत. महाराष्ट्र भरात त्यांनी आपले संगीताचे कार्यक्रम सादर केले असून अजूनही ते संगीतमय प्रवासात जगत होते. मात्र आज १३ ऑगस्ट रोजी त्यांचा संगीतमय आयुष्याचा प्रवास इथेच थांबला आहे.

अवघ्या महाराष्ट्राला ज्यांनी आपल्या आवाजाने वेड लावले त्या संगीतकार प्रल्हाद शिंदे यांचे २००४ साली निधन झाले होते. त्यांच्या पश्चात त्यांना आनंद शिंदे, मिलिंद शिंदे, दिनकर शिंदे, चंद्रकात शिंदे, सूर्यकांत शिंदे, सूरज शिंदे, किरण शिंदे अशी अपत्ये आहेत. मागील वर्षीच दिनकर शिंदे यांचे पुत्र सार्थक शिंदे यांचे निधन झाले होते. त्यांच्या अकाली मृत्यूने दिनकर शिंदे खचून गेले होते. मात्र एकामागोमाग एका वर्षी पिता पुत्राच्या निधनाने शिंदेशाही घरण्यावर दुःखाचा मोठा डोंगर कोसळला आहे.

Dinkar Shinde passed away