Kalyan Loksabha : मोदींच्या सभेपुर्वी शिवसेनेच्या कल्याण मुरबाड जिल्हाप्रमुखाचा मुख्यमंत्र्यांकडे ना-राजीनामा

Kalyan Loksabha : भारताचे पंतप्रधान नरेंद्र मोदी यांची आज कल्याण शहरात जाहीर सभा होत आहे. मात्र या सभेपुर्वी शिवसेनेचे कल्याण मुरबाड जिल्हाप्रमुख अरविंद मोरे यांनी मुख्यमंत्री एकनाथ शिंदे यांच्याकडे आपल्या पदाचा राजीनामा सुपूर्द केला आहे. मोदींच्या सभेवरून मोरे हे नाराज असल्याचे त्यांच्या राजीनाम्यातुन स्पष्ट होत आहे.

शिवसेनेच्या बंडानंतर सुरुवातीला अरविंद मोरे हे ठाकरे गटात होते. यानंतर त्यांनी एकनाथ शिंदे यांच्या शिवसेनेत प्रवेश केला. यानंतर मुख्यमंत्री एकनाथ शिंदे यांनी त्यांची कल्याण मुरबाड जिल्हाध्यक्ष पदी नियुक्ती केली. पदनियुक्तीनंतर ते मिळालेली जबाबदारी पार पाडत होते. मात्र आता मोदींच्या सभेपुर्वीच त्यांनी आपल्या पदाचा राजीनामा दिला आहे.

जिल्हाप्रमुख या पदाला धर्मवीर आनंद दिघे साहेबांनी मान प्राप्त करून दिला आहे. पंतप्रधान नरेंद्र मोदी यांच्या कल्याणमधील सभेकरिता आमदार, माजी आमदार तसेच पक्षाचे शहरप्रमुख यांना मंचावर निमंत्रित करण्यात आले आहे. मात्र शिवसेनेच्या प्रोटोकॉलनुसार जिल्हाप्रमुखालाही हा मान मिळायला हवा होता. यात माझे नाव जाणीवपूर्वक डावलले असल्याने मी या पदाचा राजीनामा देत असल्याचे अरविंद मोरे यांनी पत्रात म्हटले आहे. नरेंद्र मोदी भिवंडी लोकसभेचे उमेदवार कपिल पाटील, कल्याणचे डॉ.श्रीकांत शिंदे व ठाण्याचे नरेश म्हस्के यांच्या प्रचारार्थ ही सभा घेत असून शिवसेनेतील अंतर्गत नाराजी समोर आल्याच्या चर्चा कल्याणच्या राजकीय वर्तुळात सुरू आहेत.

Kalyan Loksabha : Shiv Sena’s Kalyan Murbad District Chief Resigns to Chief Minister Ahead of Modi’s Meeting

Kalyan Loksabha : कल्याण पूर्वेत आज शिंदे-दरेकर आमने सामने; एकाच दिवशी प्रचार रॅली

Kalyan Loksabha : कल्याण लोकसभा मतदारसंघात सध्या प्रचाराच्या फेऱ्या झडत असून कळवा ते अंबरनाथ विधानसभा मतदारसंघात प्रचार रॅली सुरू आहेत. शिवसेना विरुद्ध शिवसेना उबाठा असा सामना कल्याण लोकसभेत रंगला असून शिवसेनेकडून डॉ.श्रीकांत शिंदे व उबाठा पक्षाकडून वैशाली दरेकर हे उमेदवार लढत देत आहेत. योगायोगाची बाब म्हणजे आज कल्याण पूर्व विधानसभा मतदारसंघात एकाच दिवशी एकाच वेळी हे दोन्ही उमेदवार शक्ती प्रदर्शन करणार आहेत.

शिवसेनेचे उमेदवार डॉ.श्रीकांत शिंदे यांची प्रचार रॅली दुपारी ४ वाजल्या पासून श्री राम टॉकीज येथील पंचमुखी हनुमान मंदिरापासून सुरू होणार आहे. पुढे या रॅलीचा मार्ग अपर्णा डेअरी, खडेगोळवली नाला, रायगड कॉलनी, आंबेडकर चौक ६० फुटी रोड, शिवाजी महाराज चौक, राजाराम चौक, चिंचपाडा रोड, काटेमानिवली चौक, कोळसेवाडी, सिद्धार्थ नगर, तिसगाव रोड, गुंजाई चौक, लोकग्राम, नेतीवली रोड, चक्कीनाका असा असणार आहे.

शिवसेना उबाठा पक्षाच्या उमेदवार वैशाली दरेकर यांची प्रचार रॅली सायंकाळी ५ वाजता साईनगर शिवसेना शाखेपासून सुरू होणार आहे. पुढे या रॅलीचा मार्ग पुणे लिंक रोड, काटेमानिवली, कोळसेवाडी, सिद्धार्थ नगर, तिसगाव रोड, गुंजाई चौक, लोकग्राम, सुमेरू टॉवर पासून पुढे एका विकासकाच्या कार्यालयाजवळ या रॅलीचा सांगता होणार आहे. दोन्ही उमेदवारांच्या प्रचार रॅलीचा मार्ग हा जवळपास एकच असल्याने दोन्ही रॅली या आमने सामने नव्हे तर मागे पुढे असणार आहेत. एक वेळ एक मार्गिका असल्याने समन्वय कसा साधला जातो हे आता पहावे लागणार आहे.

कल्याण पूर्वेचा बराचसा भाग हा अतिशय कोंडीचा असल्याने या भागातील रस्ते देखील अरुंद आहेत. यामुळे दररोज वाहतूक कोंडीचा सामना कल्याण पूर्वेतील नागरिकांना सहन करावा लागतो. त्यात आता दोन्ही उमेदवार एकाच दिवशी एकाच वेळी या रस्त्यांवर शक्ती प्रदर्शनासाठी उतरणार असल्याने हे रस्ते देखील कोंडीत सापडणार आहेत. परिणामी परिसरातील नागरिक, तसेच लगीन खरेदीसाठी तसेच इतर खरेदीसाठी बाहेर पडलेल्या खरेदीदारांना मात्र मोठ्या जाचाला सामोरे जावे लागणार आहे हे मात्र नक्की.

-संतोष दिवाडकर 8767948054

Kalyan Loksabha : Shinde-Darekar face off today in Kalyan East